Shillong, Jymmang 13 : Ka Khasi Hills Autonomous District Council (KHADC) kala rai ba shen kan sa pynmih noh da ka thup jong ki Jait ki Kur Khasi kiba don hapoh u pud u sam jong ki 5 tylli ki District ka Ri-lum Khasi kiba hap hapoh u pud u sam ka Council.
Haba iakren bad ki lad pathai khubor hynne ka sngi Nyngkong, u Deputy Chief Executive Member (DyCEM) ka Council Bah Pynshngain N Syiem ula ong ba ia kane ka rai la shim ha ka jingialang kaba la pynlong da ka KHADC bad ki Nongmihkhmat jong ki Seng Kuew bapher bapher lem bad ki Khlieh Nongsynshar halor ba mih ka jingiatai halor ka kam khein Scheduled Tribe bad ka bynta jong ki Seng Kur.
“Ngi la rai ban wanrah noh da ka thup jong ki Jait ki Kur Khasi kiba don hapoh u pud u sam ka Council bad kumta, ngi la kyrpad ia baroh ki Kur ba kin phah ia ki jingtip ba bniah sha ka Council khnang ba ki Kur jong ki kin shah kynthup ha kane ka thup” ong u Bah Pynshngain.
U pyntip ba ka jingialang kala iatai ruh halor ka jingdonkam ban wad la ki don ne em ki Kur ne Jait kiba la klet ne bym don shuh hashuwa ban pynmih ia ka thup ba khatduh jong ki Jait ki Kur Khasi kiba don hapoh u pud u sam ka Council.
U Bah Pynshngain u ong ba ka thong jong kane ka long ban pynbeit ryntih ia ka rukom pyniaid ia ki Kur ki Jait ( Clan Administration) hapoh ka Ri-lum Khasi-Jaintia.
“Hadien ba ngi la shim ia ki jingai jingmut, ngi sngew b aka long kaba donkam ban don ia ka thup ki Kur ki Jait Khasi hapoh u pud u sam ka Council khnang ba ka jingai syrnod (certificate) kan long ha ka lynti kaba dei” ula bynrap.
Kat kum ka jingong jong u, ka Council kan sa pynlong biang ia ka jingialang halor kane ka kam ban ioh iadonbynta lang baroh ki Kur ki Jait Khasi.
Haba iadei bad ka jingbatai mano ba dei u Khasi, u DyCEM ula ong “Ngi la iakren ba kane ka kam kan hap ban iaid kat kum ka KHAD (Khasi Social Custom of Lineage) Act, 1997. Hynrei, ngi dang hap ban iakren ia kane ka kam kumba la pynpaw da kiba bun ki kynhun hashuwa ban shim rai ia ka kam”.
U Nongialam ka Liang Pyrshah Bah Titosstarwell Chyne ula ong ba ka Council ka sngewtynnad ba ki Kur ki jait bapher bapher lem bad ki Khlieh Nongsynshar kila kyrshan ia ka Lineage Act bad ruh ia ka jingpynbna ba dang shen bala pynmih da ka Tnad Social Welfare haba iadei bad ka kam ai Scheduled Tribe Certificate.
Ula kyntu ruh ia baroh ki Kur ki Jait Khasi ba kin aiti ia ki jingtip ba bniah khnang ba ka Council kan lah ban pynmih ia ka thup jong ki.
 ka Council Bah Pynshngain N Syiem ula ong ba ia kane ka rai la shim ha ka jingialang kaba la pynlong da ka KHADC bad ki Nongmihkhmat jong ki Seng Kuew bapher bapher lem bad ki Khlieh Nongsynshar halor ba mih ka jingiatai halor ka kam khein Scheduled Tribe bad ka bynta jong ki Seng Kur.){kind=link}