Imphal, Nohprah 20: Haduh 25 tylli ki skul ha Manipur kila shah weng noh na ka jingiasoh bad ka CBSE hadien ba ka Sorkar Jylla kala pyntip sha kane ka Central Board ba kam shym la ai satia ia ka No-Objection Certificate sha kine ki skul.
“Ka CBSE kala weng noh ia ka jingiasoh jong ki, kaba dang shu ai shen sha kine ki skul halor ka nongrim ba ka NOC bala aiti da kine ki skul ki dei ki ba khlem ai satia da ki bor khmih jong ka Sorkar Jylla” ong ka Anjali Chongtham, Joint Secretary ka Tnad Pule Puthi ka Manipur ha ka kyrwoh.
Ka Central Board of Secondary Education’s (CBSE) bylaws ka kren shai ba ki skul ki hap ioh ia ka NOC na ka Sorkar Jylla hashuwa ba kin aplai ia ka jingpyniasoh bad ka Central Board.
Ka Sorkar Manipur ha ka kyrwoh kala maham ruh ba kan leh tyngeh ia kito kiba pynkhein ia ki kyndon ka State Board bad CBSE namar ka jingleh thok leh shukor.
Khatwei tylli na kine ki 25 tylli ki skul kila ioh ia ka jingiasoh bad ka CBSE hapdeng u Jymmang 2020 bad Jymmang 2023 bad 14 tylli ki dang shu iasoh ha kine ki hynriew bnai bala leit noh.
Baroh kine ki 25 tylli ki skul ki dei jong ki artylli ki District ka Churachandpur bad Kangpokpi, kiba dei ki district ba shah ktah jur eh ha ka thma iapher jaidbynriew hapdeng ki Meitai bad ki Kuki.
