Imphal, Jylliew 02 : Ki Pulit ka Manipur hynne ka sngi Thohdieng, kila pyntip ba haduh 140 tylli ki tiar siat la wan ban pyndem ha kylleng ki jaka ka Manipur, kaba la wan jia ruh hadien ka jingkyrpad jong u Myntri kam Pohiing ka Ri u Amit Shah.
Napdeng kine ki 140 tylli ki tiar siat ba wan pyndep, 20 tylli ki dei ki suloi SLR, .303 rifle, 9mmpistol, carbine, AK, stungun, INSAS rifle, Ismoke gun, NSAS LMG, .32 pistol, M16 rifle, ki tear gas, JV{ bad ki pistol shna hi nalor ki grenade launcher, ong ki Pulit ka Manipur.
Ha ka sngi Palei, u Myntri kam Pohiing ka Ri Amit Shah ula ong ba kito kiba rah tiar ki dei ban wan pyndem noh hakhmat ki Pulit.
U Myntri ula pyntip ba ka Sorkar Pdeng kala thung ia ka Committee ka ban khlieh da u Judge bala shongthait, ban tohkit halor ka thma iapher jaidbynriew ha Manipur, kaba la shim ia bun ngut ki mynsiem briew bad pynjulor ia bun bah ki nongkynti.
Haba kren sha ki lad pathai khubor, u Amit Shah ula ong ba ka kynhun Central Bureau of Investigation (CBI) ruh kan tohkit halor ki kam pyntriem kiba mih na kane ka thma iapher jaidbynriew.
Ula kular ruh ia ki paidbah ka Jylla ba ka jingtohkit kan long ka bym iashah liang ne niew poh ia kino kino ki Jaidbynriew haba ong ruh ba ki briew kiba donkti kin ngat ha ka jingpynsajia kaba tyngeh.
U Amit Shah ula ong ruh ba ka Sorkar kan leh da kaba tyngeh ia ki kynhun kaikhlaw kiba pynkhreh ia ka soskular SoO (Suspension of Operation).
U Amit Shah ula don ha Imphal ha ka jingleit iuhkjat ba saw sngi ha kane ka Jylla.
.){kind=link}