Shillong, Jylliew 02: Ka kynhun ki Nongniah Taksi kamai-ka East Khasi Hills Local Taxi Welfare Association (EKHLTWA) hynne ka sngi Thohdieng, kala byrngem ban ujor da ka mukotduma sha Iingkashari Meghalaya High Court pyrshah iaka hukum jong ka Deputy Commissioner (DC) ka East Khasi Hills.
Kane ka jingbyrngem kala mih halor ka hukum ka Deputy Commissioner ban pyntreikam noh da ka Odd/Even number iaki kali kamai ki ban kamai ha Nongbah Shillong naduh ka 5 tarik Jylliew. Kane kan treikam tang ia ki kali kamai kiba iaid kamai sha Khyndai Lad bad sha Motphran haba buh kyndon ruh ba baroh ki kali ki dei ban dei kiba pyndait ia ki HSRP.
Shuwa kane, ki Nongniah Taxi kila pynlong ia ka jingialang paidbah ha Madan Malki bad kila pynrem jur ia ka hukum ba la pynmih da kane ka khliehduh ka District, haba pynpaw ba kane ka dei ka jingpyrshang ban knieh ia ka jakpoh jong kiba kamai kali.
Hadien kane, ki Nongniah taxi kila iatur paidbah sha ka Ophis ka Deputy Commissioner ban dawa ba kane ka khliehduh ka District, ka dei ban pynduh pyndam noh ia kane ka hukum.
Haba kren sha ki lad pathai khubor hadien ka jingialang bad ka Deputy Commissioner, u President ka EKHLTWA bah Wandonbok Jyrwa ula ong ba haka jingialang bad ka DC, baroh ki nongniah taxi kila pynpaw ba ki pyrshah jur ia ka hukum b aka pynmih ban pyntreikam daka Odd/Even iaki kali kamai ha Shillong haba pynpaw ruh ba kum ki Nongniah taxi da lei lei ruh ym pdiang satia ia kane ka hukum.
U bah Wandonbok ula ong ba kum ki nongniah kali kiba kamai daka ba niah Taksi, kin nym burom satia ia kane ka hukum jong ka Deputy Commissioner haba bynrap ba ki Nongniah Taxi kin iai kamai kumba ju kamai ha kine ki sngi ban wan bad lada mih kano kano ka kynrum kynram, ka DC kan hap ban bah khlieh.
“Haka jingialang ka DC kala pyntip ba kam lah shuh ban weng ia ka hukum namar kane ka hukum kadei ruh kum shi bynta ban pyntreikam iaka jingbthah ka Iingkashari Meghalaya High Court” ula pyntip.
Ula iathuh ba ka EKHLTWA kala kren shai hakhmat ka DC ba naka liang ki Nongniah kali kamai ruh kin sa file daka Affidavit sha ingkashari pyrshah ia kane ka hukum.
