Imphal, Naitung 28: Ka Sorkar Manipur haba mynjur ia ka jingdawa jong ka Liang Pyrshah bad ki Kynhun bapher bapher ka Imlang sahlang, ha ka sngi Palei kala rai ban khot ia ka Dorbar jong ka Iingdorbar Thaw Ain ha ka taiew ba khatduh jong une u bnai Naitung lane haba sdang taiew u Nailar.
Haba iakren bad ki nongthoh khubor hadien ka jingialang jong ka Kynhun Myntri, u Myntri ka Koit ka Khiah Sapam Ranjan Singh ula ong ba ia ki kam jong kane ka Dorbar un dang ban shim rai.
Ha kajuh ka por, ki katto katne ki lad pathai khubor kila thalain ia ka Sorkar Manipur ba kam shym la leh eiei na ka bynta u MLA ka BJP Vungzagin Valte uba la shah shuh ha ki paidbah ha Imphal myn ha ka 4 tarik Jymmang.
Halor kane, U Singh ula ong ba hadien ka jingsumar ha RIIMS ba katto katne sngi, ka Sorkar Jylla kala pynbeit ia ka liengsuin ambulance ban kit ia une u MLA sha Delhi Apollo
Hospital ba un ioh ia ka jingsumar ba kham paka.
U Singh uba dei ruh u nongaiktien ka Sorkar, ula ong ba u Valte uba dei na ka Jaidbynriew Kuki-Zomi, ula ioh ia ka jingkoit bad la pyllait ia u ban leitphai iing noh na Hospital.
U Valte ula shah thombor ha ka 4 tarik Jymmang, shisngi hadien ba khie ka thma iapher Jaidbynriew, katba u dang don ha lynti ban leit phai shala iing na ka jingialang bala khot pynlong da u Myntri Rangbah N Biren Singh.
Pule ruh:Â Jingkulmar ha Tura : Kot 46 ngut kiba la shah kem kynthup u Nongniah kali buh skul
