Imphal, Jylliew 28: Kum shibynta ban iarap ia ki briew kiba hap ban phetrieh nala ki iing ki sem bad ki shnong namar ka thma iapher jaidbynriew naduh ka 3 tarik Jymmang, u Myntri Rangbah ka Jylla N Biren Singh ha ka sngi ba-ar, ula pyllait paidbah ia ka skhim song pisa “Onetime Financial Assistance (OFA)” ba mar T. 1000 shikhlieh.
U Biren Singh ha ka sngi ba-ar ula leit jngoh ia ki jaka sah ba shipor jong kine ki phetwir ha Youth Hostel, Khuman Lampak kaba don ha Imphal East District bad ha Lamphel kaba don ha Imphal West District bad sdang ruh ban sam ia ka song jing iarap ba mar T. 1000 shikhlieh ia ki briew ba don ha kine ki jaka sah ba shipor.
Haba iakren bad ki nongthoh khubor hadien ba wan iuhkjat ha kine ki jaka, u Singh ula ong ba kane ka huri hura kala pynlong ia bun bah ki briew ban phet noh nala ki jong ki Iing ki sem.
Ha ka por ba u kren sha kine ki briew ha Youth Hostel, Khuman Lampak, u Singh ula pyntip ba ka Sorkar kala shim ia baroh ki sienjam ba lah ban shim ha kaban ai jaka sah bad ki iing ba shipor ia ki briew ba kylla phetwir.
U Myntri Rangbah ula ai ka jingiaroh ia ki seng treimon sngewbha, ki sengbhalang, ki seng kynthei bad ki Nongtrei Sorkar ka Jylla ba ki long kiba peitngor bad khang lad ia kiba bun ki jingjia ki bym sngee wiahap, bad ban iada ia ki mynsiem briew.
“Ka Sorkar kala shim ia kat ki lad kiba don ban wanrah pat ia ka jingsuk bad jingjai jai ha ka Jylla da kaba pyndonkam ia ki bor kat kiba don. Ki shipai kila don mynta ha kylleng ki jaka ban pahara ia ki shnong ki thaw bad ki paidbah” ong u Singh haba kyntu ia ki paidbah ba kim dei ban ngeit ia ki khubor hamsaia bad ban long ruh kiba jai jai.
” ba mar T. 1000 shikhlieh.){kind=link}