Guwahati, Naiwieng 18 : Ka jingialang bala khot pynlong da u Myntri Rangbah ka Manipur N Biren Singh ia ki MLA ka Sorkar Jylla ban iakren ia ka jinglong jingman ha Manipur kala sakhi ia ka jingwan iashimbynta tang 27 ngut ki MLA na ka 47 ngut.
Na ki 38 ngut ki MLA kiba dei jong ka NDA, tang 27 ngut kila wan ban iashimbynta bad kiba pep ki khlem ai satia ia kano kano ka daw.
U Myntri Rangbah N Biren Singh ula thoh ha X ba ka Sorkar kan pynthikna ia ka jingbishar kaba hok bad ban leh tyngeh pyrshah ia ki briew ba donkti ha ki kam pyniap briew ha Jiribam. Ia kane ka jingialang la pynlong ha ka 18 tarik Naiwieng.
Ki MLA kila mynjur ia ka resolution ban “pynbna ia ki kaikhlaw Kuki kum ka kynhun ba donkti ban pyniap ia ki 6 ngut ki kynthei ba lui lui bad ki khynnah kum ka kynhun ba beain hapoh ka 7 sngi”.
Ka jingialang kala shim rai ruh ban kyrpad ia ka Sorkar Pdeng ba kan pyrkhat bha ha ka jingpyntreikam mardor ia ka AFSPA kat kum ka hukum ba 14 tarik Naiwieng.
Kala rai ruh ban sdang pynlong ia ka jingkhynra kaba jur pyrshah ia ki kaikhlaw Kuki kiba donkti ban pyniap ia ki 6 ngut ki kynthei ba lui lui bad ki khynnah ha Jiribam hapoh ka 7 sngi.
Ka jingialang kala rai ruh ba lada ym pyntreikam ia kine ki resolution bala shim hapoh ka por bala buh, baroh ki MLA ka NDA kin sa shim rai ia ki sienjam ba ki dei ban shim hadien habud ha ryngkat ka jingiasyllok bad ki paidbah ka Jylla.
Kala kyntu ruh ia ka Sorkar Pdeng bad ka Sorkar Jylla ban shim ia baroh ki sienjam khamkloi kat kaba lah ban wanrah pat ia ka jingsuk bad ka jinglong ba jai jai ha Manipur.
