Imphal, Naiwieng 19: Ka jingshong synjor ka suk ka sain kala nang jur ha Manipur da ka jingtreikam ka pakhang shnong ha ki jaka them ka Jylla, kaba mih na ka jingiapher jingmut hapdeng ki bor synshar u Lat bad ki sengbhalang na ka jingthmu ban pynlong ia ka Sangai Festival, kaba la buh ban sdang ha ka 21 tarik Naiwieng.
Ia kane ka tamasa, la hap ban pynsangeh noh shwa ar snem naduh ba mih ka jingia umsnam hapdeng ki ar jaitbynriew, ia kane la pynbeit da ki bor synshar da ka jingthmu ban wanrah biang ia ka jingsuk hapoh ka jylla, kaba la hap ha ka President Rule naduh u bnai Rymphang.
Hynrei la don katto katne tylli ki seng bhalang, kynthup ïa kawei ka seng ba pawnam jong ki Meitei, ki la khot ïa ka jingïakhih naduh mynstep haduh mynmiet ha ka 21 tarik u Naiwieng, da kaba kyntu ruh ïa ki paidbah ban pyrshah ïa ka rai jong ka sorkar ban pynïaid shakhmat bad ki jingrakhe hapdeng ki jingeh ba ïadei bad ka jinglong briew ki bym pat lah ban pynbeit.
Hapdeng jong ka jingiakhih, la don ka jingkhot ban boycott ban khanglad ia kaba la pynmih da ka Internally Displaced Persons (IDPs), kiba ong ba ym lah ban pynlong ia ka tamasa katba da ki hajar ngut ki dang sahkut ha ka jingiakynad.Ki sengbhalang ki la ïalum lang ha lyndet jong ka IDPs, kaba la pynjur ïa ka jingpynbor ïa ka sorkar bad kaba la pynlong ïa ka jingkhang mynta ka sngi ha kylleng ki jaka jong ka them.
Wat hapdeng ka jingpyrshah kaba jur, hynrei ki bor synshar ki ieng skhem beit ha la ka jong ka nongrim.
Ha ka jingpynbna ba la pynmih ha ka 18 tarik u Naiwieng, u Chief Secretary ka jylla u Puneet Kumar Goel u la kyrpad ïa ki paidbah jong ka Manipur — kynthup ïa ki jaidbynriew kiba la shah pynkynriah jaka — ban ai ïa “ka jingïatreilang kaba pura” ban pynthikna ïa ka jingjop kaba khraw jong kane ka tamasa.
