Imphal, Jymmang 21: Ha ka sienjam ban iakhun pyrshah ia ki kai khlaw kaba dang iaid haduh mynta ki bor pahara ha ka jylla Manipur jong ka Kangpokpi district kila ioh ban kurup shibun bah ki tiar siat bad ki kuli ia kaba kila buhrieh bha.
Haba buddien katkum ka jingtip na ka liang syntiat, ka kynhun ba ia trei lang hapdeng ki shipai Assam Rifles bad ki pulit ka jylla Manipur Police kila pynlong ia ka jingwad bniah ban khynra hapoh ki 24 kynta ha ka shnong jong ki Kuki kum ha ka shnong Konsakhul, Pholjang, bad Tingkhai. Kane ki jingkhynra ki dei kiba la suba ba ki dei ki ktem kaikhlaw ba shipor bad ki jaka rieh kiba don hapoh ka jingpeit jong ka New Keithelmanbi Police Station.
Ha ka jingwad bniah bad khynra ki bor pahara kila ioh ia shibun ki tiar ialeh ba kynthup ïa kawei ka suloi Self-Loading Rifle (SLR) kaba don ïa ka magazine, kawei ka suloi double-barrel shotgun (DBBL), saw tylli ki suloi ba la shna hi, phra tylli ki suloi ba la shna kyrpang ia kaba la tip kum ka“Pumpis”, Motorola communication device, 20 tylli ki kuli 12 bore bad ar tylli ki bulletproof jackets.
Ia baroh kine ki tiar ba la ioh kurup la dep ban aiti noh sha Police Station ban leh ia kaba donkam.
Kane ka jingkhynra ka long kum shi bynta ban ialeh ban pynduh jait ia ki kam kai khlaw, hadien ba la pynjari da ka jingsynshar President Rule ha u bnai Rymphang mynta u snem 2025 bad naduh kane ki bor pahara kila pynlong ia ka jingkhynra kaba jur bha ha kylleng ki jaka bad kiba la ioh ruh ban pynpra ia ki ktem kai khlaw bad ioh ruh ban kurup ia shibun ki tiar siar bad kumjuh ruh ki kuli.
Uwei u heh sorkar uba ia don bynta lang ha kane ka jingkhynra u la ong, “Ka jingthmu jong ngi ban iakhun pyrshah ia ki kai khlaw kan iai bteng ban pynduh jait ia ki bad haduh mynta la ioh kurup shibun ki tiar siat bad ki kuli na ki ktem jong kine ki kai khlaw.
