Imphal, Lber 12: Ki bor pahara ki la ioh ban kurup ia shibun bah ki tiar ïaleh, kum ki kuli, bad kumjuh ruh ki tiar pynbthei kiba la bun na Imphal East district kaba hap hapoh ka jylla Manipur, ha kine 24 kynta ba ladep.
Haba bud ryntih katkum ka jingtip ba la ioh pdiang, ka kynhun ki pulit Manipur bad ki shipai Assam Rifles kila pynlong ïa ka jingkhynra bad la lap ïa ki tiar siat kiba bun bah
Ia kane ka jingkhynra la pynlong ha ki bynta jong ka Keirao Wangkhem kaba hap hapoh jong ka Irilbung police station ha Imphal East bad kane ka jingkhynra ka la neh kumba ar kynta.
Ki tiar ba ki bor pahara ki la ioh ban kurup ki kynthup ia kawei ka suloi 7.62 mm Self Load Rifle bad ar tylli ki magazines, kawei ka 5.56mm INSAS rifle bad lai tylli ki magazines, ka suloi .22 rifle bad ka magazine, ka two-bore double-barrel gun, kawei stun grenade, hynriew tylli ki high explosive hand grenades, hynriew tylli ki radio wireless sets, hynriew tylli ki bulletproof helmets, lai tylli ki bulletproof jackets bad kiwei kiwei de.
Ha kawei pat ka liang ki bor pahara ki la pynlong ia ka jingkhynra kaba jur bha pyrshah ia ki kaikhlaw kiba rieh tngen ha ki bynta bapher bapher jong ka jylla Manipur bad kumba long mynta la ioh kurup ia shibun ki tiar siat ha ka por ba pynlong ia ka jingkhynra.
Ha ka jingkhynra kaba la leh ha Tumukhong Awang Leikai kaba hap hapoh ka Thoubal Dam Police Station, la ioh ban kurup ruh sa kawei ka jaket bulletproof.
Hadien ba la pynjari ia ka jingsynshar President ha Manipur, u Lat u la kyrpad ia ki paidbah ba kin wan buh ia ki tiar siat, kiba la lute bad tuh da ki paidbah bad ki kaikhlaw ha ka por ba don ka jingia um snam na ka jingiapher jaitbynriew.
