Imphal, Lber 10: Ha ka jingpyrshang ban pynduh jait ïa ki kam pyntriem jong ki seng kaikhlaw, ki pulit ka jylla Manipur kila ioh kem haduh 12 ngut ki dkhot jong ki seng kiengatiar bapher bapher kiba don ha kane ka jylla.
Ha kane ka jingpyrshang ban ïakhun pyrshah ïa ki kaikhlaw, ki pulit ki la ioh kurup ia kawei ka kali saw shaka, 12 tylli ki mobile phone, katto katne ki kot ki sla kiba donkam bad ki shithi dawa pisa.
Ki briew kiba la shah kem ha ki pulit ki kynthup ïa ki dkhot jong ka seng Kangleipak Communist Party-People’s War (KCP-PWG group), People’s Revolutionary Party of Kangleipak- Progressive (Prepak-Pro), United People’s Party of Kangleipak (UPPK), Kanglei Yaol Kanna Lup (KYKL), bad ka National Revolutionary Front of Manipur (NRFM).
Hadien ba la pynjari ïa ka jingsynshar President rule hapoh ka jylla Manipur, kane ka jingioh kem da ki pulit ha ka shi sngi ka long kaba bun tam. Ka jingkem jong ki pulit ïa kine ki briew ka dei na ki bynta bapher bapher jong ka thain ha kine ki 24 kynta ba la dep.
Katkum ka jingiathuh ki pulit, “Ki lehnoh kiba la kit ïa ki tiar ialeh bad ki kuli, ki la dawa pisa na ki paidbah, ki kompeni shimet, bad ki heh sorkar lyngba ki kam beain jong ki”.
Kila iathuh ba ka rta jong kine ki briew kiba la shah kem kidei kiba hapdeng ka 22 haduh 39 snem bad napdeng jong kiba la shah kem, phra (8) ngut kidei na ka kynhun Prepak-Pro, lai (3) ngut na ka UPPK, ar ngut (2) na ka KCP (PWG), bad mar u wei na ka KYKL bad NRFM.
