Imphal, Nailur 12: U Chief Secretary ka Jylla Manipur u Puneet Kumar Goel ula ong baka jingwan jong u Myntri Rangbahduh ka ri u Narendra Modi, ka dei na ka bynta ban wan ai mynsiem iaki paidbah ban pynneh pynsah ia ka jingsuk, ban pynneh iaka jingshngain hapoh ka Jylla bad ban kyntiew iaka roi ka par.
U Goel u la pynpaw ba ka Manipur ka dei kum ka khyrdop sha ka thain Southeast Asia hapoh ka India’s Act East Policy bad ka don ka bynta kaba kongsan ha ka jingïada ïa ka ri.
“Ka jingsuk kam dei tang ka jingbym don ka jingïakynad hynrei ka don ruh ka jingbym don ka jingshaniah, ka jingïatylli, bad ka jingïasuk hapdeng ki paidbah. Ka jingwan jong u Myntri Rangbahduh kan pynskhem ïa kane ka lynti sha ka jingshong suk shongsaiñ” la ong Goel.
U Myntri Rangbahduh ka ri u Narendra Modi un poi ha Churachandpur ha ka 13 tarik Nailur ha kaba un ïakren nyngkong eh bad ki briew kiba la shah pynkynriah jaka lane internally displaced persons (IDPs) ha ka por 12:15 baje hashwa ban buh ïa u mawnongrim na ka bynta ki projek pynroi ba kongsan jong ka Jylla.
Hadien kata, ha Kangla ha Imphal, u Modi un plie bad buh ïa ki maw nongrim na ka bynta ki projek kiba shongdor palat T.8,500 klur kynthup T.7,300 klur ki kam pynroi ba dang sdang bad T.1,200 klur naka bynta ki kam ba la dep bad nalor kata un ai jingkren ruh ha ka jingialang paidbah ha Kangla.
“Kine ki jingthmu ki pynpaw ïa ka jingangnud jong u Myntri Rangbahduh ka ri na ka bynta ka jingbha jingmiat jong ka Jylla Manipur” ula ong da kaba kyntu ïa ki paidbah na kylleng ka Jylla ban ïashim bynta bad pdiang sngewbha ïa u Myntri Rangbahduh.
