Shillong, Nailur 12 : U Myntri Rangbah ka Jylla Conrad K Sangma ha ka sngi Thohdieng, u la ïaroh ïa ka rai ba kongsan jong ka sorkar pdeng ban pynbeit ryntih ïa ka dor jong ka GST, da kaba batai ïa kane kum ka jingpynkylla kaba kongsan ka ban ai jingmyntoi bha ïa ka jingim jong baroh ki nongshong shnong ha Meghalaya.
Haba wanrah ïa ka suo motu hapoh ka ïing dorbar thawaiñ, u Conrad u la ong, “Nga kwah ban ai khublei ïa u Myntri Rangbahduh ka ri u Narendra Modi ji, ka Myntri pla tyngka jong ka sorkar pdeng Nirmala Sitaraman ji bad ïa baroh ki dkhot ka GST Council na ka bynta kane ka rai kaba kongsan bad kaban sah jingkynmaw ha ka histori.”
“Kane ka rukom pynsuk kaba ar kyrdan kan pynkiew ïa ka jingpyllang pisa jong ki longïing bad ka jingïohnong kaba lah ban pyndonkam, namar ba bun ki mar kynthup ïa ki tiar ba donkam man la ka sngi kin kham jem dor. Kane ka rukom siew khajna kaba thymmai kaba ar kyrdan la khmih lynti ruh ba kan kyntiew ïa ki kam khaii namar kan pynsuk ïa ka jingbud ryntih bad kan kyntiew ïa ka jinglah ban ïakhun ki karkhana pynmih mar ka ri bad ka pyrthei,” u la ong.
Ia ka jingpynbeit ryntih ia ka dor jong ka GST la mynjur ha ka jingialang jong ka GST Council kaba 56, kaba la pyniaid da ka myntri pla tyngka ka sorkar pdeng. Kine ki jingpynkylla ki long ban pynbha ia ka jingim jong u paidbah bad ban pynthikna ia ka jingsuk ban leh ia ki kam khaii na ka bynta baroh, kynthup ia ki nongkhaii rit bad ki nongkhaii ba heh.
Kane ka jingpynbeit ryntih ka la pynduh noh ia ka khajna kaba 12 percent bad 28 percent bad ka la wanrah ia ka rukom siew khajna kaba ar kyrdan ryngkat bad ka dor kaba 5 percent bad 18 percent, ryngkat bad ka jingsiew khajna kaba thymmai kaba 40 percent na ka bynta ki mar pop bad ki mar kiba rem dor.
Kane ka khajna ba thymmai kan sdang treikam naduh ka 22 tarik Nailur 2025.
