Imphal, Iaiong 7: Arngut ki khynnah rit ki la ïap bad ka kmie jong ki ,ka la mynsaw jur hadien ba ki suba kaikhlaw ki la pynbthei bom ïa kawei ka ïing jong ki riew paidbah ha Bishnupur District ka jylla Manipur ha ka step jong ka sngi Ba-ar.
Katei ka jingjia, ka la jia ha ka por 1 baje mynsteo ha Moirang Tronglaobi, ha kaba u bom, uba la kynnoh ba la siat da ki kaikhlaw Kuki, u la bthei ha katei ka iing, katba ki briew kiba don ha katei ka longiing, ka dang ioh thiah.
Uwei u khynnah shynrang uba dang san snem ka rta bad kawei ka khyllung kynthei kaba dang tang hynriew bnai ki la khlad hashen ha katei ka jingbthei bom, katba ka kmie jong ki ka la mynsaw jur, la iathuh ki pulit.
Katkum ka jingong jong ki heh sorkar, baroh lai ngut ki don hapoh kamra thiah jong ki ha ka por ba ka jingbthei ka la bthei ha ka iing jong ki.
Haba pynrem jur ia katei ka jingshah thombor, u MLA ka BJP u Th. Shanti Singh u la ong ba kane ka jingle kadei ka “jingleh kam sniew kaba shyrkhei,” da kaba kynnoh ia ka jingdonkti jong ki kaikhlaw “Kuki narco-terrorists.”
“Kum kine ki kam bymman kim dei ban don jaka ha ka imlang sahlang jong ngi bad dei ban pynrem da kaba tyngeh ia kum kane ka jingleh”, u la ong.
U Myntri Rangbah barim ka Manipur, u N. Biren Singh, u la ong ba u “sngewsih jur” halor katei ka jingjia, da kaba ong ba katei ka dei ka jingleh kaba shyrkhei pyrshah ia ki riew paidbah kiba lui lui.
“Kum kane ka jingshah thombor kaba sngewsih kaba la shim ïa ka jingim jong arngut ki khynnah ba lui lui ka long kham palat ban ia ka jingpynrem,” ong u Singh bad bynrap ba kane ka jingjia ka pynpaw ïa ka jingdonkam ban don ka jingpeitngor kaba kham khlaiñ naduh tynrai bad ban shim khia ha ka por kaba biang.
U la pynpaw ïa ka jingshaniah ba skhem ba ki bor synshar ba kin pynngat ïa ki nongleh kam sniew ha ka aiñ bad pynkhlain ïa ki lad ki lynti ban ïada ïa ki riew paidbah, katba u la kynthoh ruh ba ka jylla ka dei ban kynmaw “mano ba la pynmih” ïa ki jingïakynad ha ka por ba ki dang pyrshang ban wanrah ia ka jingsuk ki dang ïaid shakhmat.
Naduh katei ka por ki bor pahara ki la pynlong ia ka jingkhynra kaba jur bha ha katei ka jaka ban lap ia kiba donkti.
Ka Moirang Tronglaobi, ka jaka kaba rit hajan ki Hills District jong ka Churachandpur, ka la sakhi ïa ki jingjia siat suloi bunsien ha ka por ba jur bha ki jingïakynad bad ka jingia umsnam hapdeng ki ar jaidbynriew ha u snem 2023 bad 2024.
