Imphal, K’Lyngkot14: Palat shi hajar ngut ki paidbah na ka jaidbynriew Kuki-Zo ki la pynlong ia ka rally paidbah kaba heh bha ha Peace Ground ha Manipur ha ka sngi Balang, da kaba dawa ban pynbeit kloi ia ka jingangnud sain pyrthei jong ki kiba la sahteng la slem bha.
Ia kane ka rally la pynlong lang da ka Kuki Zo Council (KZC) bad ka Indigenous Tribal Leaders Forum (ITLF).Ki paidbah ki la ïalum nyngkong eh ha ki lai tylli ki jaka—ka Rengkai Community Hall, ka madan ïalehkai Koite, bad ka madan ïalehkai Sielmat—shuwa ba kin ïaid paidbah ha ka jingïaid rally sha Peace Ground, ha kaba hadien la pynlong ïa ka jingïalang paidbah hapoh ka lama jong ka ITLF.
Da kaba rah ryngkat ïa ki placard bad ki banner, ki paidbah ki la pyrta bad ki mat jingdawa kum “Ngi Dawa ïa ka UT ryngkat bad ka Ïingdorbar Thaw Aiñ,” “Pynsted ïa ka jingpynbeit ïa ka saiñ hima sima jong ngi,” “Ka hok kaba la pynslem ka dei ka hok kaba la kyntait,” bad “Ngi dawa ïa ka jingsynshar ba kyrpang.”
Katto katne tylli ki banner ki pynpaw ruh ia ka jingbym shaniah bad jingsngewsih kaba jur kaba mih na ka jingia umsnam hapdeng ki ar jaitbynriew kaba dang iaid shakhmat.
Katba ka jingiaid rally ka dang iaid sha ka Peace Ground, ki nongiashim bynta ki la pyrta ia ki jingpyrta ban khot ia ka jingsynshar kaba laka jong bad ban thaw ia ka Union Territory.
Ha kane ka jingialang paidbah la ai jingkren da u Henlienthang Thanglet, Chairman ka Kuki Zo Council ha ryngkat ki nongialam na ki seng bhalang bad ki seng samla pule.
Haba ïakren bad ki lad pathai khubor, u Ginza Vualzong, u nongaiktien jong baroh ar tylli ki seng ITLF bad ka KZC, kaba la pynïaid ruh ïa kane ka jingïalang, ka la ong ba kane ka jingïakhih ka long ban pynbor ïa ka Sorkar India ban pynkloi ïa ka jingpynbeit ïa ka sain pyrthei na ka bynta ki jaitbynriew Kuki-Zo.
“Hadien jan lai snem jong ka ka jingïakynad bad ka jingia umsnam, ki jaitbynriew Kuki-Zo ki la shah beh noh na ki jaka ba bun paid ki Meitei.Kumba 40,000 ngut ki briew ki la shah pynkynriah jaka, hynrei ym shym la mih kano kano ka lad kaba skhem ha ka saiñ hima sima watla ki la ïakhih bunsien,” ong u Vualzong.
Shuh shuh u la bynrap ruh ba ka imlang sahlang ka la kylla long ban dawa ban thaw ïa ka Union Territory kaba don ïa ka ïingdorbar thaw aiñ hapoh ka Article 239 (A) jong ka Riti Synshar ka Ri India.
“Ka Sorkar India ka la sdang ïa ka jingïakren, hynrei la katto katne por mynta kam shym la don kano kano ka jingïaid lynti kaba paw ban pynbeit ïa kane ka jingeh,” u la ong.
