Imphal, Jylliew 08: Ka kynhun ki kaikhlaw kila hiar thma ia bun tylli ki Police Outpost bad wiang ding ia bun tylli ki Iing ha Jiribam District ka Manipur hynne ka sngi Saitjain.
Kat kum ka khubor, ki kaikhlaw kila wan da lai tylli ki lieng na ka wah bad hiar thma beit beit ia ki Police Outpost shuwa ba kin wiang ding ia ki iing ha Jiribam.
“Ka Chotobekra Outpost kala shah ha ka por 12:30 baje mynstep ha ki kaikhlaw bad hadien kila leit ban hiar thma sa ia ka Police Outpost kaba don ha Lamtai Khunou bad Madhupur” ong ki Heh Pulit.
Kila pyntip ba kine ki kaikhlaw kila hiar thma ruh ia bun tylli ki Iing briew kiba don harud jong kane ka wah.
Uwei u Heh Pulit jong ka police outpost ha Borobekha kaba hap ha Jiribam Subdivision, kaba jngai kumba katto katne kilometre na Chotonekra, ula pyntip ba kine ki kaikhlaw kila sdang ia ka jinghiar thma ia ki Outpost naduh ka por 2:30 baje mynstep.
Ki shipai Assam Rifle ha ka sngi Thohdieng ki dang leit iarap ia kumba 250 ngut ki briew jong ka Jaidbynriew Meitei ba kin kynriah shnong na khapsor ka Jiribam, kaba jia hadien shisngi ba mih ka huri hura halor ka jingshah pyniap u tynmen ba 59 snem ha ki kaikhlaw Kuki.
Ka Jiribam District ka dei kaba don ha khappud ka Assam bad ka dei ka jaka kaba iashong khleh Jaidbynriew. Ka dei ruh ka jaka ka ba dang lait na ka thma iapher Jaidbynriew kaba la khie ha Manipur naduh u snem bala lah.
Halor kane ka jinghiar thma ki kaikhlaw, ki shipai kila pynlong ia ka jingkhynra kaba jur hapoh ka thain ban lapdien ia kine ki kaikhlaw.
