Guwahati, Nailur 13: U Myntri Rangbah duh ka ri u Narendra Modi ha ka sngi Saitjain u la buh ia u maw nongrim jong ki project kam pynroi bapher bapher kiba kot haduh ₹7,300 crore hapoh ka jylla Manipur na ka bynta ka Churachandpur district, bad kane kadei ka sien jingleit iuh kjat ba nyngkong ha Jylla naduh u snem 2023.
U la kular ruh ia ki paidbah ba ka sorkar kmie ka angnud ban pynlong ia ka Manipur kum “ka dak jong ka jingsuk, ka roi ka par bad ka jingkiew shaphrang.”
Haba kren ha ka jingialang kaba heh bha, u Modi u la iaroh ia ka Manipur kum “ka ri jong ka jingshlur bad ka jingkut jingmut” bad ong ba ki lum jong ka ki long ka spah mariang bad ka jingpynshisha ïa ka jinglah ban ïakhun jong ki briew jong ka. “Ka kyrteng Manipur hi ka kit ia ka kyntien Mani, ka mawkordor ka ban pynkhraw ia ka jingshai jong ka North East,” u la kynthoh.
Kane ka dei ka jingleit kaba nyngkong jong u sha kane ka jylla naduh ba don ka jingïakynad hapdeng ki ar jaitbynriew kata ki Meitei bad ki Kuki ha u bnai Jymmang 2023. Ha kine ki ar snem ba la dep, ka Congress ka la dawa bunsien ïa u Prime Minister u Narendra Modi ban leit sha Manipur, ha kaba ka seng ka la wanrah wat ïa ka mat jong ka “jingsngap jar” ha Parliament ha ki bun tylli ki khep.
Ki projects ba la plie paidbah ki kynhtup ia ka surok ha sor bad ki naka kiba la kot haduh ₹3,600 crore, ki san tylli ki national highway projects kiba la kot palat ₹2,500 crore, bad ia ka Manipur Infotech Development (MIND) project, ha ryngkat bad ka working women’s hostels ha ki khyndai tylli ki jaka. U Modi u la ong ba kine ki jingthmu kin ai jingmyntoi khamtam eh ïa ki distrik kiba don sha ki bynta lum bad ki jaitbynriew riewlum, ban pynïar ïa ki lad ki lynti ha ka koit ka khiah, ka pule puthi, ka jingïadei, bad ka kam ka jam.
Shuh shuh u Modi u la pynpaw ba ka tyngka ba kot haduh ₹3,700 crore la dep ban pynlut ha ka national highways, katba kiwei pat ba kynthup ia ka ₹8,700 crore kiba dei ki project kiba dang pyniaid sha khmat.U la kdew sha ka lynti rel Jiribam–Imphal kaban sa wan ka shongdor haduh ₹22,000 klur bad ka kad liengsuiñ Imphal kaba mynta, kaba la tei ha ka jinglut kaba ₹400 klur, kum ki jingkylla na ka bynta ka jingïaid lynti bad ka jingroi.
Halor ki lad pynroi bad ki jingtei jong ka, u Modi u la pynpaw ba ka Churachandpur mynta ka pdiang ïa ka Medical College kaba nyngkong eh, katba 18 tylli ki Eklavya Model Residential School ki dang shna ha kylleng ki jaka jong ki jylla.U la ong ba jan 2.5 lak ngut ki nongpang ha Manipur ki la dep ban ioh jingmyntoi na ka jingsumar ba laitluid hapoh ka skhim Ayushman Bharat, kaba la pyllait ia ki longiing palat ₹350 klur ha ka jinglut jingsep ha ka jingsumar.
U Myntri Rangbah duh u la kren beit ruh halor ka jingkulmar bad ka jingai umsnam jong ka jylla kaba dang shu jia dang shen.Da kaba khot ia ka Manipur “ka khyndew jong ka jingkyrmen bad jingangnud”, u la ong ba ka jingiakren bad ka jingiapynbeit ka dei ka lynti ban iaid shakhmat.
“Ka jingpynlong ïa ka jingsuk ka long kaba donkam bha na ka bynta ka roi ka par,” u la ban jur, da kaba pynbna ïa ka jingïarap ba kyrpang kaba ₹3,000 klur, kynthup ïa ka ₹500 klur ba la buh kyrpang na ka bynta ki longïing kiba la shah pynkynriah jaka bad ka jingkyrshan ban shna thymmai ia ki 7,000 tylli ki ïing.
Shuh shuh u Modi u la ban jur ha kaba iadei bad ki kam pynroi jong ki riewlum kum ka “jingthmu ba kongsan eh jong ka ri,” u la ong ba palat 500 tylli ki shnong ha Manipur ki shah kynthup hapoh ka Dharati Aaba Janjatiya Gram Utkarsh Abhiyan.
“Ki kam pynroi ïa man la ka jaitbynriew riewlum, ka jingpynkupbor ïa man la ka khun kynthei, bad ka jingpynkynriah jaka ïa man la ka longïing kaba la shah pynkynriah jaka ka dei ka thong jong ngi,” la pynbna u Modi, da kaba pynthikna ba ka Centre kan kyrshan pura ïa ka jylla ha kaba pynphai biang ïa ka jingsuk bad ban tei pat ïa ki jingim.
Ha kae ka sngi la ia don lang ruh u Lat ka jylla Manipur u Ajay Kumar Bhalla bad kiwei de ki heh ophisar.
