Imphal, Naitung 15: Ka National People’s Women Front (NPWF) ka National People’s Party (NPP) ha Manipur, ka la dawa ban pynkhlain bad kyntiew kyrdan ia ka Litan Police Station ha Ukhrul District, haba maham ba ka jingbym biang ki jingtei ki lah ban pynthut ha ka jingpyntreikam ia ka ain ha kawei na ki thain jong ka jylla kaba don ka jingiaumsnam.
Ha ka dorkhas ba la thoh sha u myntri kam pohïing jong ka jylla Manipur, u Yumnam Khemchand, ka NPWF ka la ong ba ka jingjurip ba dang shen ha ka jaka ba la pynlong da ka kynhun jong ka NPP ka la lap ba ka Litan Police Station ka treikam hapoh ki jinglong jingman kiba eh haduh katta katta hapdeng ki jingjia shah thombor kiba ju jia man ka por hapoh bad sawdong jong katei ka thaiñ.
Ka dorkhas ka la kdew ba kane ka thaiñ ka la sakhi ïa ki jingïakynad hapdeng ki ar tylli ki jaidbynriew, ka jingshah pynjot ïa ki mar ki mata, ki jingïakynad da kaba pyndonkam da ki tiar bad ka jingïakynad kaba la slem ha kine ki katto katne bnai ba la dep.
Ka la ong ba ka Litan Police Station ka la don ka bynta kaba kongsan bha ban pynneh ia ka suk ka sain, nalor ba ka la jubab ia ki jingjia ia umsnam ha ka District kaba la shah ktah.
Da kaba batai ia ki pulit kum ka “first line of defence na ka bynta ki nongshong shnong khlem da khein ia ka jaitbynriew, ka NPWF ka la ong ba ka jingpynkhlain ia ka police station da ki jingtei bad ki briew kiba biang ban wanrah biang ia ka jingshaniah jong ki paidbah bad kan iarap shibun ban pynneh ia ka jingsuk.
Ka party ka la kyntu ia ka sorkar ban shna mardor ia ka kynroh kaba shngain, ban pynbha ia ki jingtei ban peitngor bad ban iada, ban buh shuh shuh ia ki pulit kiba la tbit, ban pynbha ia ki lad pyniadei bad ki tiar treikam, bad ban pynbha ia ki jaka sah bad ki jingdonkam na ka bynta ki bor pahara.
Ka la pynpaw ia ka jingkyrmen ba ka Litan Police Station kaba kham biang ki tiar kan pynbha ia ka jingpynkhreh kyrkieh, kan pynkhlain ia ka ain bad ka suk ka sain, bad kan pynskhem ia ka jingkular jong ka sorkar ban long ki pulit kiba khlem liang bad kiba tbit ha ka thain ba shah ktah ha ki jingialeh.
Ka NPWF ka la ong ba ka jingtuklar ha ka por kaba biang jong ka tnad kam pohïing kan ïarap shibun ha kaba ïada ïa ki jingim, ban pynphai biang ïa ka jingshaniah jong ki paidbah bad ban pynthikna ïa ka jingsuk kaba neh hapoh ka distrik Ukhrul.
 ka National People's Party (NPP) ha Manipur, ka la dawa ban pynkhlain bad kyntiew kyrdan ia ka Litan Police Station ha Ukhrul District, haba maham ba ka jingbym biang ki jingtei ki lah ban pynthut ha ka jingpyntreikam ia ka ain ha kawei na ki thain jong ka jylla kaba don ka jingiaumsnam.){kind=link}