Guwahati, Jylliew 14 : U General Secretary ka Congress Randeep Surjewala ha ka sngi Ba-ar, ula buh jingkylli la ka khubor ba u Himanta Biswa Sarma bad General Secretary barim ka BJP Ram Madhav, ba ki pan jingiarap na ki kaikhlaw Kuki ha ka elekshon MLA ha ka thain Shatei Lam Mihngi ka dei kaba shisha bad hato u Myntri Rangbah Duh Narendra Modi bad Myntri kam Pohiing Amit Shah ki ai jingmynjur ne em ia kane.
Kane kala mih hadien ba u Chairman ki kaikai Kuki ula kynnoh ha ka shithi sha u Myntri kam Pohiing ka Ri Amit Shah ba ha u snem 2017 bad 2019, ka Seng jong u bad kiwei ki kynhun kaikhlaw Kuki kila iarap ia ka BJP ban jop ia ka elekshon.
Haba kynthoh lyngba ka Twitter, u Surjewala ula kylli “Hato u PM bad HM ki tip ba pan jingiarap na ki kaikhlaw Kuki? Lada hooid, kumno ki ai jingmynjur ia ka? ;ada ym dei, kumno ba kim don jingtip ? Hato am dei kaba iapein bad ka bha ka miat ka Ri? Hato ka jingmyntoi ha ka elekshon ka bha kongsan ban ia ka bha ka miat jongka Ri ia kaneka Sorkar u Modi?”.
“Kaei kaba u PM, HM, ka Sorkar u Modi bad ka BJP kan leh pyrshah ia u Myntri Rangbah ka Assam Himanta Biswa Sarma bad ia u Ram Madhav?. Hato ka NIA kan register case pyrshha ia ki bad ban tohkit ia ka jingiadei jong ki lad aka don? Hato u JP Nadda President ka BJP un leh tyngeh?.
U Surjewala haba kdew ia ka khubor, ula ong ‘Ka jingmih pyrthei halor u CM ka BJP Himanta Biswa Sarma bad u National General Secretary barim Ram Madhav ka dei ka jingleh ba ktah palat bad ka dei ka bym lah shuh ban map na ka bynta ka kam iada ia ka Ri, lada lah ban pynshisha”.
Ha kajuh ka por, u General Secretary ka Congress Jairam Ramesh ula niew ia kane ka khubor kum u bomb bad ong “Kaei kaba ngi la ngeit baroh shi katta, kala paw shisha mynta ha ki jingthoh”.
Haba kynthoh ha Twitter ula ong “Kala pynshisha ia kaei kaba ngi la kren baroh shikatta. Ka Jylla Manipur kala pluh namar ka jingleh politics ka RSS bad BJP”.
Ka Manipur kala don hapdeng ka thma iapher jaidbynriew naduh ka 3 tarik Jymmang ha kaba bun ngut ki briew kila iap bad da ki hajar hajar ngut kila phetwir sha kiwei pat ki Jyla ba riehtngen.
