Imphal, Risaw 01 : Ka seng Bharatiya Janata Party ka Manipur, ha ka sngi Saitjain kala aiti ia ka dorkhas sha u President ka party JP Nadda ba kyrpad ba un tuklar lem ha kaban lah pynkut noh ia ki kam iaumsnam ha Manipur.
Ka dorkhas ka ong “Phi tip bha ba ka jinghuri hura kala jan kot mynta sha ka 4 bnai naduh ka 3 tarik Jymmang, 2023 haduh mynta. Ka longruh kaba donkam ban tip ba ki paidbah khamtam kila mad ia ki jingeh ba har rukom ha ka jingim ba manla ka sngi ha kine ki sngi baroh. Ka party jong ngi ha Jylla kala shim ia ka bynta kaba khraw ba tem ia ki jingkynad ba thymmai. Ka jingbitar u paidbah ba ki jingiakhih kila sdang ban phalang mynta, da kaba buh ia ka jingkitkhlieh ia kine kiei kiei baroh ha ka jingbym lah jong ka Sorkar ban tem ia ka jinglong jingman”.
“Ngi tip ba ka Sorkar jong ngi kala trei shong shongthait miet la bad sngi ban lah wanrah pat ia ka jingjai jai ha Jylla. Katto katne na ki ishu ba kongan kaba ki paidbah ki dawa ia ka Jylla bad ka Sorkar Pdeng ka long ban leh eiei noh mardor halor ki mat jingdawa kiba la thoh harum ba phin leh eiei mar mar” ong ka dorkhas.
Kine ki jingdawa ki long ban pynlait laitluid biang ia ki kali ba kin iaid ha ki artylli ki National Highway kia kiba ka Sorkar Pdeng bad ka Jylla ki dei ban shim ia kat kiba don ki sienjam ha kaban pynthikna ia ka jingiaid ki kali wat haduh u pud ban leh tyngeh pyrshah ia kito ki briew kiba pyrshang ban thaw jingkulmar ha shilynter ki surok Highway.
Ka dawa ruh ban wanrah biang bad ai jingiarap ia baroh ki briew kiba la kylla phetwir hala ki jong ki shnong ki thaw kham kloi kat kaba lah bad ban khmih ba kin ioh lut ia kaei kaba la kular da ka Sorkar haba iadei bad ka jingsiew bailutksan ia ki IIng bala duh bad ka jingai jingiarap ia kiba iap bad kiba mynsaw.
Kala bynrap ruh ba dei ban pynjot lut ploin ia ka jingthung poppy hapoh ka Jylla bad ban thaw iaka Joint Monitoring Committee ka ban peitngor ia kane ka kam.
Ka BJP kala dawa ruh ban iakren bad pyntip sha ka Ministry of Home Affairs ba kan pyndep kloi noh ia ka jingpynrung kyrteng biometric ia ki poiwir na Myanmar khnang ba yn lah ban pyntreikam kloi ia ka NRC hapoh ka Jylla.
