Ai khublei u CM ia ka Myntri Pla tyngka Nirmala Sitharaman
Shillong, Naitung 23 : Ka Sorkar Meghalaya ha ka sngi Ba-ar kala ai khublei ia ka Myntri Pla Tyngka ka Ri Nirmala Sitharaman namar ka jingwanrah ia ka mang tyngka, ka ban iarap kyntiew bha ia ka roi ka par jong ka Jylla Meghalaya.
U Myntri Rangbah ka Jylla Conrad K Sangma ula ong ba kane ka mang tyngka ka dei kaba pynleit jingmut kyrpang ha ka jingthaw lad ia ka iohkam iohjam bad kyntiew ia ka sap treikam ki nongshongshnong haba phaikhmat eh sha ki saw kynhun-Garib/Ki duk (Poor), Mahilayen/Kynthei (Women), Yuva/Samla (Youth) bad Annadata /Nongrep (Farmer).
“Khublei Myntri Pla tyngka ba don burom Smt @nsitharaman ju ba wanrah ia ka mang tyngka kaba pynleit jingmut halor ka jingthaw lad ia ka iohkam iohjam bad kyntiew ia ka sap treikam haba phaikhmat eh ha ki saw kynhun Garib (poor), Mahilayen (Women), Yuva (Youth) bad Annadata (Farmer)” ong u Myntri Rangbah ka Jylla ha ka X.
“Ki khyndai tylli ki bynta kiba ai kongsan eh ha ka mang tyngka-ka jingpynmih marrep bad ka jingkhlain ha ka rep ka riang, ka iohkam iohjam bad ban pyntbit ia ka sap treikam, sain dur ia ka pateng ban wan, Manufcaturing Services, Urban Development, Energy Security, Infrastructure, Innovation, Research & Development, ki dei kiba iahap bha bad ka Meghalaya Mission 10 bad kan ai ka bor ba donkam ha ka ban pyntyllun shakhmat ia ka jingkiew shaphrang jong ka Jylla” ula ong.
U Myntri Rangbah ula ong ba ka jingpynheh ia ka song pisa jong ka Special Assistance sha ki Jylla na ka bynta ka Capital Investment, kaba ai 50 snem ka ram khlem sut na ka T.1.3 lak klur sha ka T.1.5 lak klur ha kane ka mang tyngka ka dei ka dak ba bha ia ka Meghalaya bad kan nang pyntyllun sted ia ki kam tei jingtei ha ka Jylla bad bynrap “Ha u 2023-24, ngi la pyntreikam ia palat T.1300 klur na kane ka skhim”.
Ula ong ba ki jingai jingmyntoi bala pynbna ia ki Nongtrei ba dang shu sdang trei (shibnai ka tulop haduh T.15,000 ha ki 3 installment hapoh ka DBT mode) bala pynshong nongrim na ka EPFA registration ka dei kaba lah ban pyniasnoh lang bad ka Meghalaya Industrial and Investment Promotion Policy, 2024, ban pynthikna ia ka jingkha roi ki karkhana bad pynkhlain ia ka jingpynmih kam hapoh ka Jylla jong ngi.
“Nalor kane, ka jingpyniar ia ka credit guarantee scheme ban ai guarantee haduh T.100 klur ia ki MSME, kan iahap bha bad ka MIIPP, 2024 bad kan ai ia ka bai kheng kaba donkam ia ki samla jong ngi bad ia ki nong sengkam sengjam” ula bynrap.
Nalor kane, U CM ula ong ruh naba ka mang tyngka kala pynbna ia ki Industrial Park ha ki 100 tylli ki jaka sor, ka Meghalaya kan shim kabu ia kane ka lad ka lynti ha kaban wanrah ia ka Industrial Park kaba kynsai bha hapoh ka Jylla jong ngi.
“Ka Pradhan Mantri Janjatiya Unnat Gram Abhiyan scheme kan kyrshan bha ban lah pyndonkam ia baroh ki skhim ha ka Jylla. Baroh ki Shnong ha ka Jylla jong ngi kin ioh ia ka skhim ha kane ka prokram” ula ong haba bynrap ba ka jingpynkha ia 100 tylli ki shnat ha ka North Eastern Region da ka Indian Post bad Payment Bank kan nang pynjanai bad pynkhlain ia ka jingtreikam ki jingshakri ki bank hapoh ka jylla jong ngi”.
“Ka Jylla kan nym ieh satia ia kano kano ka lad ban pynthikna ba ka Jylla kan ioh bun na kine ki shnat treikam”.
Nalor kane, u Myntri Rangbah ula ong ba ka Internship skhim ba shisnem bala pynbna ha ka mang tyngka kan iarap bha ia ki nongwad kam jong ngi ba kin ioh ia ki jingshemphang na ki kompani kiba paw. Kine ki interns kin ioh ia ka allowance ba T.5000 shibnai na ka bynta shisnem bad ka allowance ba shisien ai kaba long T.6000.
