Buh mawnongrim u Myntri ban tei ia ka Ophis thymmai ka Mylliem Block
Shillong, Nailur 05: U Myntri ka Tnad Community & Rural Development Bah Hamlet Dohling, ula pyntip ba ka Sorkar Jylla kala dep ban mang haduh T. 120 klur ban nang kyntiew bad pyniar (up-gradation) ia ka jingshakri jong ki 40 tylli ki Block Ophis kiba don hapoh ka Jylla.
U Myntri ula pynbna ia kane ha ka jingialang buh mawnongrim ban tei thymmai ia ka Ophis jong ka Mylliem C&RD Block, kaba long hynne ka sngi nyngkong ha phyllaw jong ka Ophis ka Block, 5th Mile, Upper Shillong. U MLA ka Nongkrem Bah Lambor Malngiang ula iadonlang ha kane ka sngi.
“Ka Sorkar Jylla kala dep mang T. 120 klur ban nang kyntiew bad pyniar ia ka jingshakri jong ki 40 tyli ki Block Ophis ka Jylla. Kawei kawei ka Block kan ioh T 3 klur” pynbna u Myntri haba pyntip ba 6 tylli ki Block kila dep ban pyntreikam ia kane ka song.
U Myntri ula ong ba ki Ophis jong ki Block ki long kum ka jingkieng kaba pyniajan hapdeng ka Sorkar Jylla bad ki paidbah, ta ka daw ka long kaba donkam ban pynjanai ia kine ki Ophis ba kin lah ban shakri bha.
U Myntri ula iaroh ruh ia ka jingtreikam jong ka Mylliem Block Office namar ka jingtrei shitom ha ka ban pyn treikam ia ki skhim bapher bapher ka Jylla bad ka Sorkar Pdeng haba pynpaw ba baroh ki skhim bala ioh da ka Block kim ju long sepei satia.
U Bah Hamlet ula iaroh ruh ia ka jingjop ha ka jingthaw ia ki Self Help Group (SHG) hapoh ka Mylliem Block, haba ong “Kane ka urlong nmar ka jingkitkhia jong ka Block Office bad ruh ka Meghalaya State Rural Livelihood Society (MSRLS)”.
Ha kane ka jingialang, u Myntri ula ai khublei ia u Block Development Officer (BDO) ban leit noh jong ka Mylliem Block Bah P T Passah uba la ai ka jingshakri haduh 9 snem ban kyntiew ia ki shnong ki thaw ka Mylliem haba pdiang sngewbha ruh ia u BDO ba thymmai Bah Andrew Myrthong.
Kiwei pat kiba la kren ha kane ka jingialang ki kynthup ia u MLA ka Nongkrem Bah Lambor Malngiang, u Director ka Tnad C&RD SC Sadhu bad kiwei kiwei.
