Shillong, Rymphang 04 : Ka Sorkar Jylla kala mang palat T.22 klur ban pynlut ha kaban pyniaid ia ka elekshon sha ka Iingdorbar Khasi Hills Autonomous District Council (KHADC) bad Jaintia Hills Autonomous District Council (JHADC), ka ban long la 21 tarik Rymphang.
Haba pyntip ia kane ha ka sngi Ba-ar, u Commissioner & Secretary ka Tnad District Council Affairs (DCA) Bah Cyril Diengdoh ula ong “Ka pisa bala mang ia baroh artylli ki ADC ka long T.22 klur”.
U iathuh ba ka jingpynlut ka iapher na kawei ka District sha kawei pat haba bynrap ba ki Deputy Commissioner kila pynbiang ia ki jingkhein jingdiah bad ia ka pisa la pyllait sha ki kat kum ki jingdonkam jong ki.
Haba pynpaw ba ka Tnad kala dep pynbiang nadong hadong na ka bynta ka elekshon ADC, u Bah Cyril ula ong ba u Chief Secretary Bah DP Wahlang ruh ula dep lum ia ka jingialang bishar kam halor ka jingpynkhreh ia ka elekshon ha ka sngi Nyngkong bad baroh ki Deputy Commissioner bad ki Sub Divisional Officer.
“Baroh kila pynpaw ia ka jingsngewskhem ba kila dep pynbiang nadong hadong bad pynkhreh bha ia ka elekshon” ula bynrap.
Halor ka jingpynkhreh ia ki bor pahara, u Commissioner & Secretary ula pyntip ba yn sa wanrah ia ki pulit na Western Range (Garo Hills) ban pynkhlain ia ki bor pahara kiba donkam ha kaban khmih ia kane ka elekshon ha Ri-lum Khasi bad Jaintia.
“Ki jingpynkhreh kila iaid shaid shaid bad ki DC kila iatreilang bad ki SP jong ki District. Ngin sa ioh ia ki jingtip na ki Pulit ba katno kin wanrah ia ki pulit na Western Range” ula ong.
Haba iadei bad ki Polling Station kiba don jingma bad ba lah ban mih jingkulmar, u Bah Cyril ula ong ba ki DC ki dang iai lum ia ki jingtip halor kane.
Hynrei ula ong, ka Sorkar Jylla kam khmih lynti satia ban don kano kano ka jingkulmar ha kane ka elekshon ADC.
Haba kylli, u pyntip ba haduh mynta ka Tnad kam pat ioh pdiang satia ia kano kano ka jingujpr ba pynkhein ia ka Model Code of Conduct (MCC).
 bad Jaintia Hills Autonomous District Council (JHADC), ka ban long la 21 tarik Rymphang.){kind=link}