Tura, Jymmang 3: U Myntri Rangbah ka jylla u Conrad K. Sangma mynta ka sngi Saitjain u la ong ba ka sorkar ka dang iaid shakhmat ban ithuh ia ki 50 tylli ki skul ha kylleng ki jaka jong ka jylla ban ai ia ka building grants ba kin tei ia ki kamra klass ba thymmai na ka bynta ban sdang ia ka higher secondary schools.
U la pynpaw ba ia kane ka scheme yn pynioh lang na ka bynta ki skul sorkar bad kumjuh ruh ia ki skul private ia kaba yn jied katkum ki jaka halor ka jingdonkam ban sdang noh ia ka higher secondary sections. Shuh shuh u la ong ba ki skul ki hap ban ai ki katto katne ki jingdonkam hapoh ka Education Department, da kaba pynrung kyrteng ia ki khynnah bad ka pass percentage naduh ki snem kiba la dep.
“Ki Schools kiba la shah jied ki donkam ban pynbiang ia ki jingdonkam ia kaba la buh da ka sorkar kin sa lah ban ioh ia kane ka scheme kaba tang shisien kum ka building grant,” u la ong bad bynrap ruh ba ia kane ka sienjam la shim ban pyntikna ba ki khynnah kiba pass ia ka exam matric kin ioh ka lad ban bteng ia ka jingpule ba kham halor.
Ia kane u Conrad u la pynpaw haba plie paidbah ia kawei ka classrooms ba thymmai jong ka Bidanchi Higher Secondary School, Tura. Ia kine ki saw tylli ki classrooms ba thymmai la ioh jingiarap na ka Chief Minister’s Special Development Fund (CMSDF). U la pynbna ruh sa ₹10 lakh sha ka skul halor ka jingsdang ia ka higher secondary segment ha une u snem.
Haba ai jingiaroh ia ka tnad pule puthi kaba la shim bun ki sienjam ban kyrshan bad ban ialam lynti ia ki khynnah ban pynkhreh na ka bynta ka Class X board exam, ba kynthup ia ka CM–IMPACT guide books, u Conrad u la ong, “Kumba 60 hajar ngut ki khynnah kiba iakhun ia ka eksam SSLC man la u snem bad ka pass percentage ka shu long tang kumba 25 percent, khamtam eh ha ki thain nongkyndong bad u la pynpaw ia ka jingkmen ba khraw ban iohi ia ki khynnah kiba la pass ia ka exam bad kin sdang ban pule ia ki kyrdan ba kham shalor.
Shuh shuh u Conrad u la pyntip ba kane ka grant kan long haduh ₹50 lakh tyngka kaba tang shisien kum ka grant na ka bynta ban shna ia skul building.
Haba kren halor ka jingnoh synniang jong ka skul ha Tura, u la ai jingiaroh ia ki nongpyniaid halor ka jingbteng ban shakri ia ka imlang sahlang wat hapdeng shibun ki jingeh ba man la u snem, ha kane ka sngi u Conrad u la plie paidbah ruh ia kawei ka jaka pule ba dang shu dep shna thymmai ia kaba la tip kum ka “Active Learning Centre” ha Bidanchi School.
