Yn plie noh ia ka Crowborough Hotel ha u Nailur
Shillong, Nailar 24: U Myntri Rangbah ka Jylla Conrad Kongkal Sangma hynne ka sngi Balang ula pynbna ia ka Calendar jong ki tamasa ban pynlong ha ka aiom synrai bad aiom tlang ban kyntiew ia ka jingwan jong ki nongjngohkai na kylleng ki ri ka Pyrthei sha Meghalaya haba pyntip ruh ba ka Sorkar Jylla kala tyrwa ban pynlut hapdeng T. 12 klur bad T. 15 klur naka bynta kane ka kam.
U Myntri Rangbah ula pynbna ruh ia ka rai jong ka Sorkar ban plie noh ia ka Project bala sahteng da ki phew snem, ka Crowborough Hotel, ha ka 7 tarik u Nailur.
Kine ki tamala ba thmu ban pynlong ha Jylla ki kynthup ia ka Meghalaya International Film Festival, Shillong Autumn Festival, Hills Festival, Winter Tales, Me•Gong festival, Shillong Cherry Blossom Festival, Megha Kayak Fest, North East Olympic Games, Wangala, Boating Regatta, Nongkrem Dance bad kiwei kiwei.
“Ka jingthmu (jong kane ka jingpynbna) ka long ban pynkhreh bad ban pyntip sha kylleng bad ai ba baroh kin tip ba ngi la don jingthmu ban pynlong ia ki tamasa ha kane ka aiom synrai bad aiom tlang ban pynthikna ba ngin lah khring shuh shuh ia ki nongjngohkai khnang ba kin buh jingthmu ba kin wan sha Jylla ban pynsngewbha ialade da kine ki tamasa bapher bapher” ong u Conrad.
“Ka song pisa ia baroh kine ki tamasa kan kot hapdeng T. 12 klur haduh T. 15 klur. Ngi khmih lynti ban ioh ia ki jingkyr shan pisa ruh bad kine ki tamasa kin khring ia shispah shah ki nongwan kai haba ianujor bad ki snem bala leit noh” bynrap u Myntri Rangbah ka Jylla.
Haba pynpaw ba ka kam jngohkai ka dei kawei ka karkhana ai jingshakri, u Conrad ula ong “Ngi la iohi ia ka jinglait bun ki kam lyngba jong ka bad ka dei ruh ka kam kaba lah ban pynioh jingmih kaba heh ia ki paidbah bad ia ka Jylla ruh kumjuh”.
Haba pynkynmaw ia ka jingshah ktah ka kam jngohkai ha kine ki arsnem na ka jinglynshop ka khlam Covid-19, u Myntri Rangbah ula ong ba ka kam jngohkai mynta kala sdang ban kiew bad ka jingwan kai ki briew ruh kala nang bun nang bun.
“Ta ka daw, ka long kaba donkam ia ngi ba ngin pyndonkam kat kaba lah ia ka jinglong jingman hangne bad ban plie lynti ia ki Hotel bad ki Tour Operator ba kin ioh kamai bha lem bad kumjuh ruh kiwei kiwei ki kynhun kiba dei kam bad ka kam jngohkai”
Ha kajuh ka por, u Myntri Rangbah ula pyntip ba a Tej Vivanta ba thymmai ha Jylla, kaba dei ka Crowborough Hotel, yn sap lie noh ha ka 7 tarik Nailur.
“Khatduh, ia kane ka project kaba la shu sah khongreng bad mad ia shibun ki jingeh ha kine ki 30 snem, yn sa plie noh hangne ha Nongbah Shillong” ula ong.
U Pyntip ruh ba shen, ka Sorkar kan sa plie noh ruh ia ka Courtyard Mariot haba bynrap “Ngi dang pynkhreh mynta ha kaban pynthikna ba bun ki hotel bad kiwei kiwei ki jingtei kin sa mih ha kylleng ki jaka ka Jylla bad kine ki project baroh kila don hapdeng ka jingpynkhreh”.
U Conrad u ong ba kane ka Sorkar kala phaikhmat bha sha ki Homestay bad kat kum ka jingong jong u, ka Sorkar Meghalaya ka dei kaba la ai kawei na ki Homestay Programme ba biang tam hapoh ka Ri da kaba ai haduh 50-70% ka jingiarap song pisa sha ki nongioh bynta. Haduh 300 ngut ki briew ba pan ia kane ka skhim kila ioh ia ka song pisa ha kine ki khyndiat bnai bala leit noh.
