Shillong, Naitung 18: U Superintendent of Police (SP) East Khasi Hills Bah Vivek Syiem ha ka sngi Thohdieng, u la pynmih iaka hukum ba khang ia ki kali heh (Heavy Motor Vehicles) ba kin iaid sha surok shnong Demseiniong (Macabe road).
Une u Heh Pulit ula pyntip ba ia kane ka hukum la pynmih kat kum ka jingpynjari kyndon 163 BNSS da ka Deputy Commissioner ka East Khasi Hills.
U Bah Vivek u pyntip ba la ioh jingtip ba ki kali heh kynthup ki bos Night Super ki ju wan iaid na Diengpasoh bad wan rung sha Shillong lyngba ka shnong Demseiniong, kaba la wanrah ia ka jingjot ki surok bad ki sainar elektrik.
Ula pyntip ba kine ki kali heh kila buh jingma ruh ia ki iingbriew kiba don markhap ka surok ha ka thain nalor ka jingpyn thut ia ka jingiaid ki kali.
Namar kata, u pyntip ba kat kum ka jingpynjari ka Deputy Commissioner bad ban khanglad ia ka jingnang jot ki surok bad ka jingshngain ki nongkynti ki briew ha ka thain, la khang ia ki kali heh kynthup ki bos night super ba kin iaid lyngba ka shnong Demseiniong (Macabe Road).
Nalor kane, ula pyntip ruh ba baroh ki kali heh kynthup ki bos night super yn shah noh ban iaid lyngba ka surok Diengpasoh tang haduh Itshyrwat kata ruh tang hapdeng ka por 9 baje mynmiet haduh 6 baje mynstep jong ka sngi kaba bud. Ula pyntip ba yn ym shah ia ki kali heh ban iaid sha Demseiniong.
Une u Heh Pulit ula ong ba kino kino kiba pynkhein ia kane ka hukum kin ngat haki jingpynsajia kat kum ka ain.
