Shillong, Risaw 31: Haba kam ba ka sorkar ka leh bym suidniew ia ki mat jingdawa ba sahteng mynta la jan ar snem, ki nonghikai skul deficit ha Khasi bad Jaintia Hills ki la byrngem ba kin pynjur ia ka jingiakhih.
U President ka Khasi Jaintia Deficit School Teachers’ Association (KJDSTA) Bah Boswell Pala u la ong ba ka executive committee jong ka association ka la ïakynduh ïa ki managing committee jong ki skul deficit bapher bapher ban pyntip ïa ka nongrim halor ki mat kiba pynjynjar ïa ka rukom pynïaid skul deficit.
Ka jingialang ka long kaba seisoh bad u la ong ba ka Association ka la ioh ia ka jingkyrshan kaba pura naki School Managing Committee.
U Bah Boswell u la ong ba ka Sorkar ka leh bym suidniew haba kadei bad ka jingbym pyntreikam ia ka Centralized Provident Fund kaba 10 percent, ha kaba ka jingnoh synniang ka dang sahkut ha ka 8 percent, ka jingpynslem ban pynkiew ia ka DA bad ki jingsiew ba sahteng, ka NPS, ki Pension Scheme jong u snem 2023 bad 2026 kiba ka association ka la kyntait, ka jingkynnoh ba ka don ka jingleh thok ha ka jingpynkylla ia ka Board of Trustees bad ka thungkam thung jam.
Halor ka DA, u la kynnoh ba ka sorkar kala leh bym suidniew iala ka jingkular.
“Ki la ong ia ngi ba ngin sa ioh ia ka jingpynkiew DA, ka DA shwa ka shuti Puja. Mynta, sa kawei pat ka shuti kan sa wan, ngim pat ioh ia kata ka jingpynkiew iaka DA” ong u Bah Boswell.
U la ong ba ka Association ka la aiti ia ki mat jingdawa sha u Myntri Rangbah ka Jylla bad kila shim ruh ia ka mass casual leave, hynrei ka jubab kaba la ioh ha ka 8 tarik u Risaw kam long satia kaba sngewhun.
“Ngi dang shu dep iashong ia ka jingialang hapdeng ka EC jong ka KJDSTA bad ki School Managing Committee bad nga sngew sarong shibun ban ong ba ngi ioh ka jingkyrshan ba pura naki”
u Pala.
“Ki Managing Committee ki kyrshan bha ia ka jingialeh jong ngi bad ki kitbok kitrwiang ia ngi baroh,” u la bynrap.
U Bah Boswell u la ong ba ia ka rukom pynlong ia ka jingiakhih kaba thikna yn sa rai daka Executive Committee jong ka KJDSTA.
“Ngin ym sngap jar, ngin sa pynjur tang nangne shakhmat iaki jingiakhih” u la ong.
