Shillong, Iaiong 13 : Ka Hynniewtrep Youth Council (HYC) hynne ka sngi Palei, kala maham ia ka Sorkar Jylla ban mih ka jingjia kum ha ka jingiakhih MBoSE lada kam lah ban pynbeit thikna ia ka kam kaba iadei bad ka jingpyntreikam ia ka Roster System hapoh ka Jylla.
Ha kajuh ka por, ka HYC kala dawa ia ka Sorkar Jylla ba ka dei ban pyntreikam ia ka Roster System jong ka Job Reservation Policy naduh u snem 2022 shakhmat ym naduh ki snem bala leit noh.
“Ngi kwah ban pynkynmaw ia ka Sorkar Jylla ba lada kam lah ban pynbeit ia kane ka kam, nga sheptieng ba ki jingjia kumba jia ha ka jingiakhih MBoSE kin jia biang ha Jylla. Namar kata, ngi kyrpad ia ka Sorkar ban pynbeit noh mardor ia kane ka kam la ka long lyngba ka Kynhun Myntri lane ka Iingdorbar Thaw Ain lane ka All Party Meeting, ngim don jingsngew eiei hynrei kaei kaba ngi sngew ka long ba dei ban pynbeit noh shisyndon ia kane ka kam” ong u President ka HYC Bah Robert Kharjahrin.
Ka HYC kala buh ia kane ka jingdawa ha ka dorkhas bala aiti sha ka Sorkar Jylla lyngba u Chief Secretary ka Jylla Bah D.P.Wahlang hynne ka sngi. Ia kane ka dorkhas la aiti ruh sha baroh ki Myntri Sorkar bad ki Nongialam jong ki Seng sain pyrthei ba kin tuklar lem halor kane ka kam.
“U Chief Secretary ula pyntip ha ngi ba un sa rah ia kane ka kam hapoh ka jingialang jong ka Kynhun Myntri bad ngi kyrmen ba ka Kynhun Myntri kan mynjur ia ki mat ba ngi kdew namar ngi la iohi ha ki social media bad ha surok baka don ka jingsngew iapher kaba jur mynta hapdeng ki paid Khasi Jaintia bad ki Garo” ong u Bah Kharjahrin.
“Ngim kwah ban iohi ia kane ba kan iai neh kumne, ngi kwahban iohi ba ka Sorkar kan mih shakhmat mynta bad ban pynbeit noh ia kane ka kam namar ka jingthmu ban don ka Sorkar ka long ban pynbeit ia ki jingeh ym ban ieh ia ki jingeh kumne khlem da pynbeit ia ki” ula bynrap.
U Bah Robertjune ula ong “Mynta, lada phi peit ia ka jingiakren, u Myntri ula kynnoh ia ka Iingkasahri bad ka Iingkashari kala ong ba ka ieh ha ka Sorkar ban pynbeit ia u snem ot kyrteng. To ngin kyrmen ba ka Sorkar ban mih shakhmat ban pynbeit noh ia kane ka jingjia bad ngi ngeit ba shisien bala dep pynbeit ia ka kam, kane ka jingeh kan jah lang noh bad ki samla Khasi Jaintia bad Garo kin sdang ban ia aplai kam biang”.
U Bah Robertjune u pyntip ba ha kane ka dorkhas, ka HYC kala dawa ba u snem ot kyrteng (cut-off year) ban pyntreikam ia ka roster system ka dei ban long naduh u snem 2022 namar ka Iingkashari Meghalaya High Court kala kren shai ba kine ki kam kin biang eh ban ieh ha ka Sorkar bad ka Iingdorbar Thaw Ain ban shim rai.
“Kane ka long ruh namar ba ka Iingkashari Supreme Court ha kiba bun ki mukotduma, kala kren shai ba ka roster ka dei ia kaban pyntreikam ia u snem ba shakhmat ym ba shadien. Namar kata, ngi kwah ban iohi ia ka rai jong ka Sorkar la ka long lyngba ka Iingdorbar Thaw Ain, ka All Party Meeting ne ka Kynhun Myntri naba ia ka Office Memorandum (OM) lah ban pynkylla wat ha ka kyrdan jong ka Kynhun Myntri” ula bynrap.
Une u Nongialam ka HYC ula ong ba ka seng kala dawa ruh ba haba phai sha ki jingioh bhah duna ha ki snem bala leit noh, kam dei satia ban don ka jingiaid lait na ka policy.
Pule lang ia kane: Lah ban leit iasoh noh ka PDF sha ka NPP, hato yn bujli Myntri thymmai u CM ?
