Shillong, Nailur 25 : U President ka Meghalaya Pradesh Congress Committee Bah Vincent H Pala ha ka sngi Thohdieng ula pynkynmaw ia ka jingleit iasoh ki 17 ngut ki MLA ka Congress sha ka Trinamool Congress ha ka por jong u bah Metbah Lyngdoh kum u Lamphang ka Iingdorbar bad ong, ba une u President ka UDP ula don mynta ha kajuh ka khep kumba mad ka Congress.
U Bah Vincent ula kynnoh ba ka rai bala ai da u Bah Metbah ha ka jingujor ka Congress ha katei ka por ka long kaba shah liang.
“Nga kynmaw ha ka por u Bah Metbah kum u Lamphang, 17 ngut ki MLA jong ngi kila phet seng, ula ai ia ka hukum kaba shah liang bad mynta ula don ha kajuh ka khep kaba ka congress ka don ha katei ka por” ong u Bah Pala.
U Bah Pala u ong ba u juh u nongiasaid ain uba mihkhmat ia ka Congress ha ka mukotduma ban mait kyrteng ia ka jing long MLA kine ki 17 ngut, mynta u dei u kyrtong iakhun MP ka UDP.
“Ujuh u nongsaid ain u dei u kyrtong MP. Nga kyrmen ba ula pynkhreh bha ia ka mukotduma ban mait kyrteng- Ngam tip la kila pynkhreh ne em ban ujor mait kyrteng ia ka jinglong MLA kine kiba phet seng. Une u MP ka UDP ba mynta u dei u nongiasaid ain uba tbit ban ujor ia ka mukotduma pynduh long MLA bad u dei u juh u nongsaid ain ka Congress ha katei ka por” ula ong.
U Bah Pala ula ong ba ki nongialam ka UDP kin hap mad mynta ia kaei kaba la mad da ka Congress kham hashuwa.
