Shillong, Naiwieng 05 : Ka 5 tarik Naiwieng 2024, kan dei ka sngi kaba pynjaw ummat kthang ia ki paid Nongrep ha kylleng ki jaka ka Ri-lum Khasi Jaintia namar ka jinglynshop u phria uba jur bha bad pynjulor lut ia ki jingthung jingtep.
Kane ka jingther u phria kala jur eh ha ki thain West Jaintia Hills, Eastern West Khasi Hills, West Khasi Hills bad East Khasi Hills District ka Jylla.
U bnai Naiwieng u dei u bnai ba kmen tam jong ki nongrep khamtam kiba rep kba namar kala dei ka aiom ban ot. Bun ki Nongrep kila shu ap satang ia ki sngi ban leit ot bad leit lum ia u kba uba dang don ha ki pynthor bad ki lyngkha.
Hynrei u phria uba la wan ryngkat bad u slap, ula lynshop ia ki jaka rep baroh bad pynjulor lut ia u kba uba ki nongrep kila apkhmih lynti ban kheit noh iala u jong u soh ka jingtrei shitom.
Ha West Jaintia Hills, ki shnong kiba shah ktah jur eh ha kane ka jinglynshop u phria ki dei ka Mustem, Muplang, Moosakhia, Samanong bad ki shnong kiba marjan.
Haba iakren bad ki nongialam shnong jong kitei ki shnong, kila pyntip ba kila dep ban pyntip ia kane ka jingjia sha ki Block Development Officer (BDO) ba kin leh ia kaba donkam.
Ka Eastern West Khasi Hills ruh ka dei kaba jur bha ka jingshah pynjulor khamtam ha ki thain Mairang, Mawnai, Lawbyrtun, Rikhen, Maroid, Nongkhlaw, Pariong bad kiwei kiwei.
Ha West Khasi Hills, ka thain Mawshynrut ka dei kaba la jur bha ka jinglynshop u phria.
Ha East Khasi Hills ruh, ka jinglynshop u phria kala jur bha ha ki thain Mawphlang, Lyngkien, Lyngiong, Nongspung bad ki shnong ba marjan.
