Shillong, Iaiong 14 : U phria bad ka eriong kaba jur bha, kila lynshop hynne ka sngi Nyngkong ha West Jaintia Hills bad haduh 9 tylli ki Shnong bad palat 260 ngut ki nongshongshnong kila shah ktah.
Kine ki shnong kiba shah ktah ki kynthup ia ka Barato, Latymphu, Maitdein, Iongkynshur, Thangrain bad Bhain, Umsalang bad ki shnong ba marjan kiba hap hapoh ka Laskein C&RD Block.
Kat kum ka kaiphod na u Block Development Officer (BDO) ka Laskein Block, Dr FR Shadap la iathuh ba haduh 120 tylli ki Iing kila julor ha kane ka jinglynshop u phria bad ka eriong ha kine ki shnong ba shah ktah bad haduh 20 ngut ki briew la hap ban pynkynriah noh sha kiwei pat ki Iing jong ki marjan marjan bad bahaiing hasem.
Ka Shnong Umsalang ka dei kaba shah ktah jur bha bad ha kane ka shnong, haduh 96 tylli ki Iing kila julor.
La iathuh ba kawei ka skul ha Thangrain kala julor ha kane ka jinglynshop ki bor ka mariang.
La ioh khubor ba ka Ophis jong ka Block ka dang lum jingkhein ia ki jingjulor baroh kynthup ia ki jingthung jingtep bad kiwei kiwei.
