Shillong, Jylliew 18 : Ka lyiur kaba la wan iuhkjat ha Jylla naduh ka 10 tarik Jylliew, kala wanrah ia u slap uba la neh bun sngi ha ryngkat ki jingpynjulor, kiba la ktah haduh 42 tylli ki Shnong ha ki 6 tylli ki District ka Jylla bad shim ia arngut ki mynsiem briew.
Kat kum ka jingkhein bala ai da ka Meghalaya State Disaster Management Authority (MSDMA), kane ka lyiur kala pynjulor ruh haduh 36 tylli ki jingtei ba kynthup ia 17 tylli ki Iing nalor ki jaka rep kiba la kot sha ka 4.45 hectare.
Ka West Garo Hills, ka dei ka District kaba shah ktah jur bha ha kane ka lyiur ha kaba haduh 24 tylli ki Shnong kila shah ktah kynthup haduh 2825 ngut ki briew.
Artylli ki Iing bad haduh 15 tylli ki jingtei kila shah pynjulor ha kane ka District ka Ri-lum Garo na ka jingther jong u slap.
East Khasi Hills : Ha kane ka jinghap slap hapdeng ka 10 tarik Jylliew haduh 17 tarik Jylliew, kawei ka Shnong kala shah ktah ha East Khasi Hills bad uwei u briew ula iap na ka jingngam jyllop. Une u briew ba ngam jyllop u kyrteng u Bah Probino Warbah ba na Tynring, uba la ngam jyllop ha ka 7 tarik Jylliew bad ioh ia ka met ha ka 10 tarik Jylliew ha Wah Umrynjah, Mawlai.
East Jaintia Hills : Kawei ka shnong kala shah ktah jur ha kane ka lyiur bad haduh 107 ngut ki briew kila shah ktah ha kane ka District. La iathuh ba ka jingpynjulor kala jur eh ia ki jaka rep ha kaba haduh 3.45 hectare ka jaka rep kala shah ktah.
Eastern West Khasi Hills : Artylli ki Shnong kila shah ktah ha kane ka District bad 3 tylli ki Iing kila shah pynjulor kaba la ktah ia 5 ngut ki briew.
South West Khasi Hills : Kane ka dei ka District kaba shah ktah jur eh ha kane ka lyiur ha kaba haduh 11 tylli ki Shnong kila shah lynshop ha u slap, uba wanrah ia ka jingjulor haduh 13 tylli ki Iing bad ktah ia kumba 88 ngut ki briew. Artylli ki jingtei ha kane ka District kila shah pynjulor bad haduh 1 hectare ka jaka rep kala shah pynjulor.
West Khasi Hills : Lai tylli ki Shnong kila shah lynshop jur eh ha u slap bad haduh 11 ngut ki briew kila shah ktah. Ha kane ka District, uwei u briew ula iap na ka jingpom pyrkhat kaba jia ha ka 12 tarik Jylliew. Une u briew u kyrteng u Bah Kanty Maram uba dei na Nongkroh Rambrai.
Ka MSDMA ka pyntip ba ki jingtwa khyndew bad jingpoi umsaw ki wah, kila jia tang hapoh ka West Jaintia Hills bad South Garo Hills bad ka jinglum jingkhein ia ki jingpynjulor ka dang iaid shakhmat.
