Tura, Nailar 05 : U Myntri ka Tnad Pule puthi Rakkam A Sangma ula lum ia ka jingialang iasyllok bad ki Heh Ophisar ka Tnad lem bad ki Nonghikai skul Elementary ka Ri-lum Garo lane bad ka MBoSE halor ka jingjur palat ka jingpep skul shiteng por jong ki Khynnah ha Ri-lum Garo.
Ia kane ka jingialang la pynlong ha Circuit House, Tura hynne ka sngi Saitjain kaba la iakren sani bha halor ki daw ki daw ba pynjyllei ia ki khynnah kiba pep skul shiteng por bad ban wad ruh ia ki buit kumno ban weng noh ia kane ka jingeh.
Haba maitphang ia ka jingiasyllok, u Myntri ula pyntip ba ka jingpep skul ki khynnah skulk a jur bha ha baroh ki Primary bad Seccondary level, kaba la buh ha ka jingeh ia ka jingkiew shakhamt bad ka jingroi jong ka thain haba bynrap bala donkam ban shim ia ki sienjam kiba donkam ban wad ia ki daw tynrai bad ban weng noh ia ki.
U Myntri ula kdew ruh ba ka Sorkar kan sa buh jingkhein (map) ia baroh ki skul Sorkar bad ki Nonghikai bad ban wanrah ruh ia ka rukom ai jinghikai ba kumjuh ha kine ki sngi ban wan khnang ban lah pynjanai ia ka jingai jinghikai ia ki khynnah haba kyrpad ruh ia ki nonghikai ba kin shim ia ka jingkitkhlieh ba kin ai ka jinghikai da ka jingaiti lut.
Ha kane ka jingialang iasyllok, kala mih ka jingiakren hapdeng u Myntri, ki Nonghikai Skul bad la ithuh ba ka daw ba kongsan hi halor ka jingpep skul shiteng por jong ki Khynnah ka dei namar ka jingbym biang ki jingtei jong ki jaka pule, ka jingkrih sha Sor, ka jingdon nonghikai ki bym pat pyntbit bad kiwei kiwei.
Kila don shibun ki jingai jingmut na ki riewshemphang kynthup ia ki Nongpyniad skul bad ki heh ka MBoSE ba kynthup ia u Executive Chairman, MBoSE Tura Ambrose Ch Marak, Deputy Commissioner, West Garo Hills, Tura Jagdish Chelani, Chairman, Tura Municipal Board, J D Sangma, Additional Deputy Commissioner, WGH Rezia Ch Sangma, Principal, Don Bosco College, Rev. Fr Threnius Sangma bad kiwei kiwei.
Pule ruh: Iakhih ka NEHUSU bym lah pynbiang bad ka NEHU ia ki samla ba leit ialeh eksam
