Nongpoh, K’lyngkot 24: U MLA ka Jirang Bah Sosthenes Sohtun hynne ka sngi Balang, ula lum ia ka jingialang bad ki Heh Ophisar ka Jylla ban iamir jingmut halor ki sienjam ba lah ban shim ha kaban tehlakam ia ka jingpynmih jaboh jong ki karkhana ha Byrnihat kaba la pyniohnam ia ka Byrnihat kum ka jaka sor ba jaboh tam ka lyer hapoh ri India.
Ia kane ka jingialang la pynlong ha IB Byrnihat ha ka jingiadonlang u MDC ka Jirang Bah Victor Rani ryngkat ki ophisar sorkar ba kynthup ia u BDO ka Umling C&RD Block uba dei u Assistant Commissioner, u Bah Eric Kevin Dkhar, u Senior Scientist ka ka Meghalaya State Pollution Control Board Bah S. Swer, bad kiwei kiwei ki ophisar na ki tnad sorkar.
Kat kum ka kaiphod ka Centre for Research on Energy and Clean Air (CREA) bala pyllait dang shen, la pyni ba ka Byrnihat ka dei ka jaka sor ba jaboh tam ka lyer hapoh ka ri India.
Haba kren sha ki lad pathai khubor, u Bah Sosthenes u la iathuh ba ka jingthmu ba la khot ia kane ka jingialang ka long ban ia kren sani halor ki lad ki lynti kumno ban shim khia na ka bynta ban pynduna ia katei ka jingmih ka lyer jabah kaba la pynioh nam ha ka ri India baroh kawei.
U la iathuh ruh ba ka Meghalaya State Pollution Control Board (MSPCB) kan sa shimkhia ban tehlakam ia ka jingpynmih lyer jaboh kaktkum ka juk stad ba mynta.
“Ngim lah ban tip kane ka jingjaboh ba la ioh nam ka dei kaba sdang naei, namar ha Byrnihat ki Karkhana ne ki jingthang plastic kam dei tang na u pud u sam ka Meghalaya, hynrei haba phai sha shiliang ka Byrnihat ki don ruh shibun ki Karkhana ha ki jaka ba hap ha ka jylla Assam” ula ong.
