Shillong, Naitung 07 : U Myntri Rangbah ka Jylla Conrad K Sangma, hynne ka sngi Thohdieng, ula lum ia ka jingialang jong ki Heh Ophisar ka Tnad ka Koit ka Khiah ha ka jingiadonlang ka Myntri Kong Ampareen Lyngdoh, ban iasyllok halor ki buit ban pynkhlain bad pynjanai ia ki jingai jingshakri jong ki jaka ai jingsumar hapoh ka Jylla.
Kane ka sienjam ka dei kaba la shim kum shibynta na ka jingkut jingmut jong ka Sorkar ban pynjanai ia ka rukom ai jing shakri ki jaka ai jingsumar ia baroh ki nongshongshnong ka Jylla.
Kawei na ki mat ba iakren ha ka jingialang ka long ban wanrah ia ka Public Health bad Specialist Cadre System hapoh ka Tnad ka Koit ka Khiah. Kane ka Policy ka dei kaba thmu ban pynjanai ia ka jingtreikam ha ka liang ka koit ka khiah bad ban pynthikna ba ki jingshakri jong ki doktor specialist kan poi sha kito kiba donkam.
Nalor kane, ka Meghalaya kala pyntreikam ruh ia ka rukom ba thymmai ha ka jingthied jingpet jong ka Tnad ka Koit ka Khiah ha kaba ki jaka ai jingsumar ki dei ban phah ia ki jingdonkam bad ka tnad kan leh mar mar ia ka kam ba dei ban leh. Kane ka rukom ba thymmai kan pynthikna ba ki jingdonkam baroh kin poi sha ki jaka sumar khlem kano kano ka jingthut.
Ha kajuh ka por, ka Sorkar Meghalaya ka dang pynkhreh ruh ban wanrah ia ka policy kaba shai ha ka jingpynkynriah kam bad thungkam ia ki nongtrei ka koit ka khiah. Kane ka policy ym tang ba kan pynkhlain ia ka jingdon ki nongtrei hynrei kan pynthikna ruh ba ka jingbuh ia ki nongtrei kan long mar katjuh ha kylleng ki jaka sumar ka Jylla.
Haba ithuh ia ka jingkongsan ban iadonbynta lang ki shnong ki thaw, ka Sorkar kala plan ruh ban thaw ia ki Village Health Council, ki ban long ki rynsan ban iakren hapdeng ki shnong ki thaw bad ki bor khmih ka tnad ka koit ka khiah, ban pynthikna ba ki rai halor ka koit ka khiah ki dei kiba iaid kat kum ka jingdonkam bad jingangnud u paidbah.
U Myntri Rangbah ula pynpaw ia ka jingsngew skhem ba kine ki sienjam bad ki policy kin wanrah ia ka jingkylla ha ka jingshakri ka Sorkar ha ka liang ka koit ka khiah hapoh ka Jylla.
Pule ruh: Rah ka Sib Singh HSS bad St Peter’s HSS ïa ka Subroto Cup Football ha WKH
