Shillong, Iaiong 03: U Chairman ka Meghalaya State Planning Board (MSPB) bah Metbah Lyngdoh hynne ka sngi Nyngkong, ula lum iaka jingialang jong ka Board naka bynta ban pyrkhat iaki kam ki jam jong ka Board.
Haba kren sha ki lad pathai khubor u bah Metbah ula ong ba ia kane ka jingialang la lum tang ban ithuh iaki nongkitkam ka MSPB haba pyntip ba haduh mynta ka sorkar jylla kam pat pyllait lane kam pat pynmih iaka jingpyntip halor ka jingthung ia kiwei pat ki dkhot jong ka Board.
U bah Metbah ula iathuh ba haduh mynta ka MSPB ka dang don tang 3 ngut ki dkhot ba kynthup Chairman bad 2 ngut ki Co-Chairmen kiba dei ruh ki MLA.
Ula iathuh ba kumba ju long, kiwei ki dkhot ka MSPB kin kynthup naduh u Chief Secretary, Commissioner & Secretary bad kiwei ki stad na kiwei pat ki tnat treikam ka sorkar jylla.
Shuh shuh ula bynrap ba ka MSPB kan sa iakren bad u Myntri Rangbah ka jylla bad u Chairman ka Board ruh un sa pyntip iaki dkhot kumba 4-5 ngut ki ban don bynta ha kane ka Board.
U bah Metbah ula ong “Hadien bala thung lut iaki dkhot jong ka MSPB, ka Board kan sa sdang ban treikam noh ha kaban iathir kumno ban pyniaid shakhmat ia ki kam bad kiwei pat ki tnat treikam ka sorkar jylla”.
“Ngin sa sdang noh iaki kam haka taiew ban wan, ngin lum shwa ia ka jingialang bad ngin sa iakynduh ia u Myntri Rangbah ka jylla ban iakren halor ka kamram jong ka Board bad kumno ba ngin lah treikam bha bad ngin sa iakren bad u ” la ong u bah Metbah.
U bah Metbah ula ong ba ki dkhot ka MSPB kim don ha kane ka Board tang ban shim kabu iaki jingmyntoi shimet hynrei ki don hangne naka bynta ban trei naka bynta ka jingmyntoi ka jylla baroh kawei.
