Nongpoh, Naiwieng 30 :Ka Regional Committee jong ka Ri-Bhoi District, hynne ka sngi Balang kala lum ia ki kot ki sla ban pynshisha ia ka hok longtrai jong ka Jylla ia ki jaka ba don hapdeng ka jingiakajia pud bad ka Assam ha ka Shnong Deshdoomrea bad ka Block-II.
Kane ka Regional Committee bala khlieh da u Symbud Myntri Rangbah Bah Prestone Tynsong, kala shong jingialang biang hynne ka sngi bad ki Khlieh Nongsynshar na ki Hima ban pyntyllun shakhmat ia ka jingpynkhreh jong ka Jylla ban leit sha ka jingiakren pynbeit pud jongka wat kaba ar bad ka Jylla Assam, ka ban sa long shen.
Ha kane ka jingialang la wan ban iashimbynta da u Syiem ka Hima Khyrim Dr Balajied Sing Syiem, u Basan Nongkseh ka Hima Mylliem, u Bah H Wahlang Syiem ka Hima Jirang bad kiwei kiwei ki Nongialam Shnong, Hima bad ki Raid.
Ki Dkhot ka Committee kiba iadonlang ki kynthup ia u Bah Dasakhiat Lamare, MLA ka Mawhati ba dei ruh u Myntri Sorkar, Bah Mayralborn Syiem, MLA ka Nongpoh Constituency, Bah Sosthenes Sohtun MLA ka Jirang Constituency, Bah Jambor War, EM,KHADC, u Arpit Upadhayay Deputy Commissioner bad u Giri Prasad Superintendent of Police ka Ri-Bhoi.
Haba kren bad ki Nongthoh Khubor, u Bah Prestone Tynsong, u la ïathuh ba kane ka jingïalang kala ïathir bad ki kynhun bapher bapher nalor ki nongïalam shnong nongïalam Hima bad Raid ban tip shai halor ka jinglong trai ïa ka khyndew ka shyiap jong ki jaka ba iakajia pud hashwa ka jingïakynduh bad ki nongïalam ka Regional Boundary Committee ka Assam.
Kat kum ka jingong jong u, kane ka jingïalang kala ïathir halor ki ar tylli ki jaka kiba kynthup ïa ka Deshdoomrea bad ka Block II, ha kaba ki nongmihkhmat na kine ki thaiñ ki la pynbit pynbiang ïa ki kot ki sla bad ruh ka jingpynshisha halor ka jinglong trai ïa kine ki jaka.
Ha kaba ïa dei bad ka Deshmoorea, u Bah Tynsong u la pynpaw, ba katkum ki sakhi satar ba la pyni da ki nongïalam ka Hima Mylliem bad ki nongïalam shnong, kane ka Shnong ka dei kaba dang hap hapoh u pud u sam ka jylla Meghalaya naduh hyndai hynthai bad na ka liang ka Committee kan nang bishar bniah bha ia ki kot ki sla hashwa ban ïa kynduh bad ki bor ka Assam.
