Shillong, Naiwieng 22: Ka Boundary Committee jong ka Khasi Hills Autonomous District Council (KHADC) hynne ka sngi ka la lum ia ka jingialang jong baroh ki khlieh nongsynshar shnong bad ki nongialam jong ki Hima bad Raid kynthup na ka Hima Mylliem, Raid Nongtung, Hima Nongspung bad Hima Jirang.
Haba kren sha ki lad pathai khubor u Chief Executive Member (CEM) ka Khasi Hills Autonomous District Council (KHADC) u bah Titostarwell Chyne u ba dei ruh u Chairman ka Boundary Committee u la ong ba ka rai kaba mih na kane ka jingialang ka long ba ka Committee ka la aiti ha ki Hima baroh ba kin pynbiang ia ki kot ki sla ki dulir jaka na bynta ban rah sha ka Regional Committee ka ban sa long ha ka 30 tarik Naiwieng, 2022.
U bah Titos u la ong ba ki don 22 tylli ki shnong kiba hap ha ka Hima Khyrim bad ka Raid Nongtung, ka Bardua kaba heh 147 sqm ka hap hapoh ka Raid Nongspung kaba don 8 tylli ki shnong bad naka liang ka Wah Mawtamur la wan mihkhmat da u Syiem ka Hima Jirang bad ki jaka kiba hap hapoh ka Raid Khadar Boitha la kam ba ka hap hapoh ka Hima Mylliem bad kin sa wanrah ia ki kot ki sla na bynta ban pynskhem ia kine ki jaka.
“La rai ban pynbeit bad aiti ha ki Hima baroh ba kin aiti ia ki kot ki sla kiba donkam baroh ha shwa ban shong ia ka Regional Committee ha ka 30 tarik” la ong u bah Titos.
