Shillong Nailar 03: Ka Inland Waterways Authority of India (IWAI) hynne ka sngi Palei, kala lum iaka jingialang kaba nyngkong eh ka jongka bad ki nongkhaïï dewiong bad mawshun ka jylla Meghalaya ban iatai sani halor ka jingpyndonkam da ki jhad kit mar ha kaban pynkit ia ki marpoh khyndew sha kiwei pat ki ri.
Ia katei ka jingialang la lum da u Vinayak Azaad, IRS Member (Traffic & Logistics) Inland Waterways Authority of India, ha kaba la donlang ki heh ophisar la jylla na ka tnad Mining bad ki nongkhaii dewiong kiba la ioh jingbit ban tih ia u Mawshun katkum ka juk stad Saïan bad ki nongkhaïï mawshun na ka jylla.
“Ka jingthmu jong katei ka jingialang ka long ban iakren bad ban sngewthuh iaki jingdonkam jong ki nongkhaïï ha kaba iadei bad ka kam khaïï pateng bad kiwei pat ki ri. Ngi don ruh ia ki Terminal Operator kiban pyniaid iaki Terminal ha Pandu bad Dhubri, Guwahati, Assam, kaba dei ruh ka lynti iaid kaban pyniasoh bad ka Indo Bangladesh Protocol (IBP) bad kaba pyniasoh bad kiwei pat ki bynta jong ka ri India” ong uAzaad haba iakren bad ki nongthoh khubor.
“Kane kadei ka jingthmu ban kyntiew ha ka jingpyndonkam ia ki wah ne ki National Waterway, khamtam eh ha ka thaiñ shatei lam mihngi jong ka ri bad ban kytiew ia ka thaiñ ha kaban pyndonka mia ki wah kiba don ha ka ri bad iaka lynti iaid jong ka IBP ” ong Azaad.
Ula ong, ba ia mynta hi yn sa leit ban khmih ia ki wah kiba don ha jylla Meghalaya kiba iajan bad ka ri Bangladesh ban peit iaka jingeh bad ka jingjylliew ka jongki khnang ba yn sngewthuh la yn lah ban pynurlong iaka jingkhaïï pateng lyngba ki Lieng ne ki Jhad kit mar kiban iaid ha ki wah bad ba ka jinglut jingsep ruh kan long kaba shong tad bha na ka bynta ki nongkhaïï haba ianujor bad kiwei pat ki rukom khaïï pateng.
Naka liang u Bah Sajay Laloo uba dei uwei na ki nongkhaii pateng, ula ong ba ka jingkhaïï pateng lyngba ki Liengheh ne Jhad kan pynduna bha iaka jingpynlut pynsep ha ka kit ka bah bad lada kyntiew bad pyniaid shakhmat ia kane ka projek ha ka jylla.
Ula ong, ba ka kit ka bah bad kiwei kiwei ki jingpynbit pynbiang ki long kiba kongsan bha haka khaïï pateng kaba lah ban pynïap ne kyntiew ia ki mar ki mata. Lada ka dor ha ka kit ka bah ka long kaba remdor kumta yn ym don iew don hat ban die ia ki mar ki mata hynrei lada ka duna dor, kumta kan don ka jingdawa ha kylleng ki ri bad kane kan iarap ia ngi ban shalan ia u dewiong sha kylleng ki ri.
U Bah Laloo ula ong, ba lada lah ban pynkit ia ki mar ki mata lyngba ki jhad kiba iaid ha ki wah, kan ym don jingma eiei na ka jingwan rung kyrthep ki briew kiba nabar namar ha kitei ki jhad yn pynkit thik tang ia ki mar ki mata bad kan don ruh ka jingpyrkhing ha kaban bud ryntih ia ki kyndon ha kaba iadei bad ka khaïï pateng bad kiwei pat ki ri.
