Shillong, Lber 29 : Ka Ophis ka Deputy Commissioner ka East Khasi Hills District hynne ka sngi Saitjain, kala lum ia ka jingialang bad ki nongialam jong ki Shnong bapher bapher kiba don ha khappud ka East Khasi Hills, Ri-Bhoi bad West Jaintia Hills District.
Ka jingthmu jong kane ka jingialang ka long ban iakren bad batai ia ka jingthmu jong ka Tnad Urban Affairs ban buh ia ka jaka theh niut ha Lum Sohlait, ha ka shnong Nonghali.
Haba kren sha ki nongthoh khubor, ka Deputy Commissioner kong RM Kurbah ka pyntip ba ki Rang bah Shnong bad Sordar jong kine ki Shnong kila pynpaw ia ka jingsngewkhia halor ki jingktah jong ka jaka theh niut ia ka wah Umkhen kaba don sha them jong kane ka jaka bala tyrwa.
Ka kong Kurbah ka ong ba namar ka jingpyrshah na ki Nongialam Shnong, ka public hearing bala buh ban long ha ka 2 tarik Iaiong la hap banpynkynriah shuwa ban ailing ia ki Rangbah Shnong, ka Tnad Urban Affairs bad ka Pollution Control Board ba kin nang pynshai shuh shuh ia ki paidbah halor ka jingdonkam ban buh ia ka jaka theh niut kat kum ka juk saian ha Nonghali.
“Ki kham khuslai bha halor ka wah Umkhreh namar ka dei ka tyllong ba bsa umbam umdih. Ngi la batai ia ki halor ka project hynrei ki sngew ba ki donkam shuwa ban nang pynsngewthuh ia ki paidbah hala ki jong ki shnong, kumta ngi la aipor shibnai ia ki ba kin iakren shuwa hala ki jong ki Shnong” ong ka kong Kurbah.
Ka kong Kurbah ka pyntip ba kum kane ka jingialang bad baroh ki Khlieh Nongsynshar Shnong yn sa pynlong biang hadien shibnai khnang ban ailad ia ki ba kin iakren iasyllok shuwa hala ki shnong.
Ka bynrap ba ha kane ka jingialang, la batai ia ki khlieh nongsynshar shnong ba ka jaka theh niut ha Marten, Mawiong ka dei kaba la buh mynshuwa ia kaba la mang ia ki nongshongshnong ba 10000 ngut.
“Ngi la batai ha ki ba tad haduh u 2016, ki briew kila bret ia u niut kat shaba lap ha Marten hynrei hadien u 2016, ka jingkongsan ban pyniakhlad ia ki niut la pyntreikam ha katei ka jaka bad kumta mynta ki niut kynthup ka um, kim tuid shuh sha pung Umiam” kala bynrap.
Ha kajuh ka por, u President ka Synjuk Nongsynshar Shnong Par Umkhen, Bah Super Rngaid ula ong ba ki paidbah jong kine ki Shnong kim shaniah satia ia ka Sorkar haba iadei bad ka jingbuh ia ka jaka theh niut ha Nonghali.
U Bah Rngaid ula ong ba ki paidbah ki sngewkhia halor ka jingktah jong ka project ia ka Wah Umkhen kaba dei ka nongai jingim khamtam ia ki nongrep jong palat 15 tylli ki Shnong.
“Ha ka jingialang ngi la kyntu ia ka Deputy Commissioner ba pynlong shuwa ia ki jingialang pynsngewthuh paidbah, ka jingiakren bad baroh ki paidbah bad ruh ban don ia ka jingiateh kular kaba thikna shuwa ban pyntyllun shakhmat ia ka project” ong u Bah Rngaid.
