Shillong, Naitung 03: Ka seng ki nonghikai Adhoc hapoh ka shatri Meghalaya Upper Primary School Association (MUPSTA) hynne ka sngi kila kynduh ia u myntri ka tnat pule puthi u Rakkam A Sangma ban buddien halor ka jingdawa ban kyntiew kyrdan iaki 844 ngut ki nonghikai Adhoc Upper Primary Schools shaka Deficit System.
Haba kren sha ki lad pathai khubor u president ka MUPSTA u bah Kenneth Shadap ula iathuh ba ka jingiakynduh ia u myntri ka tnat kadei hi ban buddien iaka jingdawa kyntiew kyrdan bad ban iakren ruh halor ki jingeh ba ki nonghikai Adhoc jong ka jylla Meghalaya ki iakynduh.
“Ka sorkar barim ka MDA kala tyrwa ban kyntiew kyrdan iaki 844 ngut ki Adhoc Upper Primary Schools shaka Deficit System katkum ka Office order memo No. EDN/172/2006/69 Dated Shillong the 7th February/2019 and DSEL/EL/GB/Misc/16/2010/Pt.1/221dated 18.03.2019 bad kum ki nongialam ka MUPSTA, ngin wan pynkynmaw halor kane ka jingdawa” la ong u bag Kenneth.
U bah Kenneth ula iathuh ruh ba ki nonghikai Adhoc ki shem jingeh ruh haba iadei bad ka jingrit palat ka jingsiew bad kane ka pynlong iaki para nonghikai ban shem jingeh ban kyrshan iala ki khun ban bteng iaki jingpule ha bun rukom.
Ula kam ruh ba ha ki snem bala dep ka sorkar ka jingiarap ba ki Schoola ki ioh lyngba ka Grant-in-Aid ruh ka long kaba rit bha bad ka don ruh ka jingshah pynduh iaka bai Uniform, ka bai iarap pynbha iaki jingtei hynrei ia kine ki jingiarap, ki school SSA ki ioh khlem da don kano kano ka jingshah pynduh ne pynduna.
“Haka jingialang ngi la kyntu ruh ia u myntri ka tnat ban khmih lang halor kane ka mat ban dang bteng ka jingiarap lyngba ka Grant-in-Aid shaki School Adhoc nalor ka jingdawa kyntiew kyrdan ban pyntrei hok iaka Equal Pay for Equal Work” ula ong.
U bah Kenneth ula iathuh ba haka jingialang, ka MUPSTA kala pyntip ruh sha u myntri halor ka jingeh haba iadei bad ka jingthungkam iaki nonghikai hadien bala mih bad bala pynlong ba donkam ban pyndep iaka MTET ban shah thung kum nonghikai hapoh ki School adhoc.
“Ki don ki School Adhoc ki bym ioh ban thung nonghikai la palat 1 snem tam namar ba mih ka jingpyntreikam iaka MTET. Ki don ki nonghikai kiba tbit hynrei kidei ki bym pat dep iaka eksamin MTET bad halor kane ngi la kyntu ia u myntri ban khmih lem halor kane” ula ong.
Pule lang ia kane: Manipur: Pyllait ki Kuki ia 5 ngut ki samla Meitei ban phah ia ka khubor ka jingiasuk
