Dibrugarh, Risaw 13 :Haduh kumba 900 ngut ki nongtrei khamtam na ka Seng Congress bad NPP kila leit ban pyniasoh ia lade sha ka BJP ha Arunachal Pradesh hynnin ka sngi Balang.
Kine ki nongtrei ka Congress bad NPP kila leit ban pyniasoh sha ka BJP ha ka jingialang paidbah kaba la long hapoh ka shnong Kaimai kaba hap hapoh Borduria Bogapani assembly constituency hapoh Tirap district ka Arunachal Pradesh.
U president ka BJP ha Arunachal uba dei ruh u MLA u Biyuram Waghe, u vice-president ka BJP u Junti Singpho, u general secretary Nalong Mize nalor kiwei pat ki nongialam kila ia don lang ha kane ka jingialang.
Lah ban kdew ba ka Borduria Bogapani assembly constituency hapoh Arunachal Pradesh mynta ka dei kaba la mihkhmat da u Wangling Lowangdong na ka party Congress.
U Lowangdong ula pynrem noh ia u kyrtong ka BJP u Jowang Hosai da kaba tam tang 97 vote ha ka ilekshon assembly kaba la dep ha Arunachal Pradesh.
Haba aijingkren ha ka jingialang, u heh nongialam ka Arunachal Pradesh BJP u Biyuram Waghe ula khot ia ki nongtrei ka party ban trei na ka bynta ka bha ka miat jong ki paidbah nongshong shnong ka jylla bad ruh ban shim ia ki sienjam ban pynshai paidbah ha kaba iadei bad ki skhim ka sorkar pdeng bad sorkar jylla kumjuh.
Une u heh ka BJP ula khot ruh ia kine ki dkhot kiba la wan pyniasoh sha ka party ba kin trei shitom ban pynthikna ia ka jingjop jong ka BJP.
“Ki nongtrei ka party ki dei ban trei minot na ka bynta ka bha ka miat jong ki paidbah nongshong shnong jong ka thain, bad ban iarap ruh ia ki paidbah ba kin tip shaphang ki skhim jong ka seng BJP. Ka BJP kala trei shitom na ka bynta ka roi ka par jong ka thain.Ngi kut jingmut skhem ban trei na ka bynta ka bha ka miat jong ki paidbah ka jylla Arunachal Pradesh hi baroh kawei,” ong u Waghe.
Shuh shuh ula ong ruh ba ki paidbah ki dei ban jied ia ki nongialam kiba shemphang na ka bynta ka roi ka par jong ka thain ka jong ki.Ula ong ruh ba ki nongtrei ka party ki dei ban trei shitom bad ban iarap ia u kyrtong ka BJP khnang ba un ioh ia ka jingjop ha kane ka ilekshon assembly na kane ka constituency.
Ka Borduria Bogapani assembly constituency ha Arunachal Pradesh ka don kumba 12,000 ngut ki nongthep vote.
