Gangtok, Risaw 14 :Ki bor shipai India hynnin ka sngi Palei kila leit ban pyllait ia kumba 550 ngut ki nong shangkai pyrthei kaba kynthup ia ki longkmie bad ki khynnah kiba la sahkut ha Lachung ha ka thain shatei ka Sikkim hadien ka jingjia twa khyndew, ong ka lad pathai khubor ki shipai.
Na ka liang ki bor shipai kila ai ia ki jingiarap bad ioh ban pyllait noh ia baroh ki 550 ngut ki nong shangkai pyrthei kiba la sahkut namar ka jingtwa khyndew kaba la jia jia hadien ka jingther jong u ‘lapbah ha ka thain shatei ka Sikkim.
“Ki bor shipai kiba don hapoh ka ktem ha Lachung mardor kila shim ia ki sienjam hadien ka jingkyrpad da ki bor sorkar na ka bynta ban aijingiarap ia kine ki nong shangkai pyrthei kumjuh ia ki trai shnong kiba la sahkut ha ki surok hapdeng ka jingther jong u ‘lapbah bad ka jingkhriat kaba tasam,” ong shuh shuh katei ka jingthoh.
Katkum ka khubor la iathuh ruh ba ki don katto katne napdeng ki nongwan shangkai pyrthei kiba la kem pang bad khynniuh namar ka jingkhriat kaba palat liam ia kiba la pynkit noh sha ki hospital ba marjan jong ki shipai na ka bynta ban aijingiarap.
Na ka liang ka tnat Border Road Organisation (BRO) ruh kala iashim bynta ha kaba iadei bad ka jingpyrshang ban pyllait ia ki lynti surok kiba la shah khang na ka jingtwa khyndew, hynrei haduh mynta hi kim pat shym la lah ban pynkhuid ia ki lynti wat hapdeng ka jingpyrshang borbah namar ki jingtwa khyndew ki long kiba jur nalor ka jingther jong u ‘lapbah.
“Na ka liang ki bor shipai mardor kila leit ban aijingiarap sha kine ki nong shangkai pyrthei kiba la sahkut lyngba ki umdih, ka bam, ki lad jingsumar na ka bynta kiba la kham noh rat bad ki khunlung khynnah,” ong shuh shuh ka khubor.
Shuh shuh na ka liangk i bor shipai kila iarap lang ruh ia ki bor pulit ka Sikkim ha kaba iadei bad ka jingdheng kali kaba shyrkhei, bad kat haduh ka por 6 baje janmiet baroh ki nongwan shangkai pyrthei la lah ban pynpoi hapdeng ka jingshngain sha la ki jong ki hotel ha Lachung.
Kumta ruh kane ka jingkloi jong ki bor shipai ban shim ia ki lad jingiarap kala pyllait na kino kino ki jingjia ba sngewsih bad kaba la wanrah ruh ka jingiaroh hapdeng kine ki nongwan shangkai pyrthei, ong shuh shuh ka khubor.
Ha ka 12 tarik mynta u bnai ha ka por kumba 7.00 baje mynstep, ka lynti surok na Chungthang sha ka jaka jngohkai ba kongsan ha Lachung ha ka thain shatei ka Sikkim kala shah khang lynti noh namar ka jingjia twa khyndew ba shyrkhie ha ki katto katne ki jaka.
