Shillong, Naitung 15: Ka Hynniewtrep Youth Council (HYC) hynne ka sngi kala leit pan jingpynshai naka Medical Superintendent (MS) ka Ganesh Das Hospital halor ka jingoh dor ban sumar ia ki khunlung hapoh ka Neo Natal Intensive Care Unit.
Ia kane ka jingbuh dor la pynmih haka 5 tarik Naitung 2024, da ka Internal Management Committee kaba dei peit bad pyniaid ia kane ka Hospital ha ka Building thymmai ba don ka Neo Natal Intensive Care Unit.
Haba kren sha ki lad pathai khubor, u President ka HYC u Bah Roykupar Synrem, ula iathuh baka seng kala ioh jingujor naki paidbah haba iadei bad ka jingbuh dor ban sumar iski khunlung khamtam iaki ba dang shu kha.
U Bah Roykupar ula iathuh ba kane ka jingpynmih iaka jingoh dor thymmai ka kot haduhT.1500 shi miet naka bynta ban buh iaki khunlung ba dang kha ha ki Ventilator, ban ai Oxygen, u Centralline ban pyndait bad ai dawa bad kiwei kiwei de.
Ula ong ba ki briew ba duna haka ioh ka kot na kylleng ka Jylla ki ju wan phah sumar ha kane ka Hospital iaki khunlung hynrei kane ka jingoh dor thymmai kan buh jingeh bha iaki.
“Halor kane, ngi la wan ban pan jingpynshai naka MS ka Ganesh Das Hospital bad ngi la ai jingmut ba ka Hospital ka dei ban pyntreikam hok iaka MHIS ban iarap iaki paidbah ha ka ban siew iaka jinglutksan bai sumar” ong u Bah Roykupar.
U Bah Roykupar ula iathuh ba haka jingiakren baka MS, la ioh jingkular ruh baka Ganesh Das Hospital kan buh daka MHIS Cell ban pynrung kyrteng haka Aadhaar Card bad ban pyniasoh bad ka MHIS Card.
“Lada don ki paidbah, ki bym don iaka MHIS Card, ka MS jong ka Ganesh Das Hospital kala kular ban pyllait iaka bai sumar lada ki paidbah ki wanrah iaki BPL Card, Ration Card bad ka jingthoh naki Rangbah Shnong ban pynshisha ba ki wan naki longiing ba duna haka ioh ka kot” ula ong.
