Shillong, Naitung 15 : Ka Khasi Students’ Union (KSU) kala pynieng khyrdop Inner Line Permit (ILP) sa ha ka thain Umkiang, East Jaintia Hills, ban pyrrkhing ia ka jingrung kyrthep ki bar jylla shapoh Meghalaya.
Ia kane ka khyrdop la pynieng harud ka surok NH-6 ha ka shnong Umstain hynne ka step sngi Nyngkong.
Kane ka khyrdop ka dei kaba lai kaba la pynieng da ka seng KSU ha ki jaka rung jaka mih ha khappud ka Assam. Kawei ka dei ha Pahammawlein, Ri-Bhoi kaba la shah wiang ding bad kawei ha Athiabari, West Khasi Hills District.
Ka KSU kala shim ia kane ka sienjam ban pynbor ia ka Sorkar ba kan pyntreikam noh ia ka Inner Line Permit (ILP) ha Jylla bad kumjuh ruh ia ka Meghalaya Residents Safety & Security Act (MRSSA).
Ha kine ki khyrdop, ka KSU kala pynieng ruh ia ki banner kiba don ia ka jingthoh “ Ka Inter-State Migrant Workmen ( Regulation & Employment and Condition of Services) Act, 1979 (Work Permit), kala treikam ha Jylla Meghalaya naduh ka 28 tarik Naitung 2011.
Kawei pat ka banner kala kynthoh “Ki Infiltration Check Gate ki shu long tang ki khyrdop lum khajna jong no re jongno”.
Ki Nongialam bad ki Dkhot ka KSU-East Jaintia Hills, kila pynlong ia ka jingtalasi ia ki kali bar jylla ha kane ka khyrdop bad khmih bniah ia ki kot ki sla ban pynthikna ba kim dei ki briew kiba rung beain.
La ioh jingtip ba bun ki bar jylla kila shah pynphai biang sha Assam namar ka jingbym don ia ki kot ki sla kiba biang kynthup ka Work Permit.
Na ka liang ki bor Pulit ka thain, kila hiar sha kane ka khyrdop ban pynthikna ba kan nym pynmih ia kano kano ka huri hura, kaba lah ban pynthut ia ka shongsuk shongsain.
