Shillong, Naiwieng 03 : U Myntri kam ialehkai ka Jylla Bah Banteidor Lyngdoh hynne ka sngi palei, ula hiar leit jurip ia baroh ki jaka ialehkai bad ki jingtei bala pynkhreh ban pynong ia ka North East Olympics Games 2022.
Nalor ka JN Stadium, u Myntri ula leit jurip ruh ia ka SAI Complex NEHU.
Lah ban kdew ba ka Meghalaya Games kala jah burom na ka jingbym lah pynbiang ki nongpyniaid ia ka jingdonkam jong ki rang bad ki thei ialehkai, kaba la pynbor ia u Myntri Rangbah ka Jylla Conrad K Sangma ban leit jngoh dalade ia ka JN Stadium bad ban tuklar hi ia kane ka kam.
Ki rynsan social media kila shlei da ki dur ba pyni ia ki painkhana ba jaboh, ki sad kiba jaw um bad kiwei kiwei, kaba ktah ia ka koit khiah jong ki nongialehkai.
Ban nym ailad shuh ia kum kane kajuh ka jinglong jingman, u Myntri kam ialehkai ula shimkhia ban leit jngoh hi dalade ia ki jingtei bad ki madan ban pynthikna ba ka jingpynkhreh kan long kaba biang nadong hadong.
Ka North East Olympic Games kaba 2, ka dei kaba la ioh pynlong da ka Meghalaya kum shibynta na ka jingrakhe ia ka jingdap 50 snem ka jingioh Jylla ba pura. Kane ka lympung ialehkai kan sdang naduh ka 10 tarik Naiwieng haduh ka 16 tarik Naiwieng. Kane ka lympung ba nyngkong la pynlong ha Manipur ha u snem 2018.
Kin don haduh 3000 tam ki nongialehkai nalor ki Official ha kane ka NEOG 22 ka ban don ka jingialehkai haduh 18 tylli ki discipline.
