Shillong, May 10: U Nongkit ktiensyiem na ka ri France sha India, u Thierry Mathou hynne ka sngi Thohdieng ula wan jngoh ha ka sien kaba nyngkong eh ia ka jylla Meghalaya, ha kaba ula leit ban jngoh ia ka Lawkyntang, ki Mawbynna bad ia ka Heritage Village ha Mawphlang, East Khasi Hills.
Une u Nongkit ktiensyiem ne Ambassador ula iaid kjat palat 3 Km ban jngoh ia ka Law Kyntang, ba la ialam da u Khlieh jong ka Kur Lyngdoh ka Hima Mawphlang Bah Tambor Lyngdoh Mawphlang.
U Bah Tambor ula batai ia u Ambassador shaphang ka jinglong jingman jong ka Law Kyntang ba ka dei ka khlaw kaba kyntang bad la mana pyrshah ban leh ia kino kino ki kam jakhlia hapoh kane ka khlaw.
U Thierry Mathou ula ong, “Nga dap da ka jingsngewtynnad ban jngoh ia ka Law Kyntang. Ngi hap ban shemphang na kane ka Kur kumno ban iada ia ka mei mariang bad ia ki jait jingim bapher kiba don ba em ha ka. Kane ka jingwan jngoh kala ai ia ka jingpynsngewthuh bad ia ka lad ban iakren bad iakhana”.
Hadien kane, u Mathou ula leit ban jurip ia ka Dam Mawphlang ha kaba la iadon ryngkat kiheh ophisar jongka tnad Public Health Engineering (PHE) kiba la pyntip ia u Ambassador kumno la pynpoi ia ka umbam umdih sha ki 77.15% tylli ki longiing ha Sor bad khapsor.
