Shillong, Lber 08: Ka kynhun ki nongthoh khubor kaba shiphew ngut na Meghalaya kala poi ha Gangtok kum shi bynta jong ka jingwan jurip kaba 6 sngi ia ka jylla Sikkim, kaba la pynlong da ka Press Information Bureau (PIB) Shillong.
La pdiang sngewbha ia kane ka kynhun ki nongthoh khubor bad ki heh ophisar ka PIB Shillong mar ia poi ha Gangtok, da ki heh ophisar jong ka PIB Gangtok.
Ki nongpathai khubor kin leit ban jngoh ia ki jaka bapher kiba don ha kane ka jylla bad khamtam ban iakren bad ki heh ophisar ka jylla bad ki briew kiba donbynta lang ha ka kam ban sngewthuh ia ka jingseisoh jong ki sienjam kiba kila shim.
Ka kynhun kan leit jurip ia ka Spices Board India Regional Office ha Gangtok, ICAR–National Research Centre for Orchids bad kin leit ruh ban peit ia ka Indian Orchid Festival 2026 ha Pakyong, kaban pyninam ia ki syntiew Orchid kiba mih kyrhai ha kane ka thain.
Nalor kane, kin leit ruh ban jngoh ia ka Vibrant Village ha Tingra ban sngewthuh ia ki sienjam kiba la shim halor ka kam pynroi kiba la pyntreikam ha ki thain khappud hapoh jong ka Vibrant Villages Programme. Ki nongpathai khubor kin leit ruh ban jngoh ia ka Rumtek Monastery, Ban Jhakri Falls and Energy Park, ka Tsomgo Lake, ka Nathu La Pass bad Baba Harbhajan Singh Mandir.
Kane ka kynhun kane leit ruh ban iakynduh ia u Lat ka Jylla Sikkim bad ia u Myntri Rangbah ka Sikkim ban iakren bad sngewthuh ia ka kam synshar khaddar bad ia ki kam pynroi kiba kongsan.
Kane ka jingleit ialam ia ki nongthoh khubor kadei kaba la pynlong da ka PIB Shillong kum shi bynta ban pynkhlain ia ka jingiadei hapdeng ki nongthoh bad nongpathai khubor ka thaiñ bad ban ai ia ki jingtip kiba thikna ha kaba iadei bad ki kam pynroi kiba kongsan ha kane ka thaiñ kiba kynthup ia ka rep ka riang, ka kam rep ia ki syntiew ki skud, ka jingwad bniah bad ki kam pynroi ha ki thain khappud.
 Shillong. ){kind=link}