Shillong Nailar 19: Ka Chairperson jong ka State Commission for Protection of Childs Right (SCPCR) ka Agatha Sangma kala pynrem jur ia ki riewsniew kiba thombor ia kawei ka khynnah skul da kaba dung da u nar injekshon katba ka dang iaid lynti ban leit sha Skul ha ka thain Jaiaw.
“Ka long kaei kaei kaba pynkyndit ia baroh namar kadei ka kam ka bym pat ju jia hapoh ka jylla ka jong ngi mynshwa bad nga sngewkhuslai ban jia kumne. Ngi lah iohkren ia u doctor bad kane ka khynnah kala don hapdeng ka jinglong jingman kaba biang bad kam don satia ha kano kano ka jingma” ong ka Agatha Sangma hadien ka jingwan peit ia ka khynnah ha Dr H Gordon Robert Hospital.
Kane ka jingjia kala jia ha ka janmiet sngi Nyngkong, katba kane ka khynnah kynthei ka dang iaid lynti ban leit sha skul hakhmat ka ophis treikam jong ka Bible Society of India kaba don ha Jaiaw Pdeng.
“Kum ka Commission ngi pynrem jur ia kane ka jingleh kaba kum kane bad ngi kwah ba ka jylla ka jong ngi kan dei kaba shngain ia ki khynnah ki jong ngi. Ka dang iaid lynti ban leit sha skul bad ban leit sha skul kadei ka hok ia man la ki khynnah bad ngi kyrmen skhem ba ngin lah ban ai ia kata ia man la ki khynnah. Ngi donkam ia ka jingiatreilang na baroh” kala ong.
Kane ka MP barim ka Jylla kala ong ba ka sorkar ka hap ban leh ia la ka jong ka bynta bad ka imlang sahlang ruh kadei ban leh ia la ka jong ka bynta bad ki nongpathai khubor ruh kila rah ne pynsngew ia kine kiei kiei bad nga dap da ka jingkmen ba kila lah ban pynsngewthuh ia ki paidbah.
Ka Agatha kala ong ruh ba kala ioh iakren bad kane ka khynnah bad ka dap da ka jingkmen ba watla kala shah dung da u injekshon hynrei ka dang don ia ka bor pyrkhat kaba biang ban leit phah khmih ialade ha ka jaka sumar bad ban shah sumar hapoh hospital bad kane ka jingdon kane ka khynnah ia kane ka rukom pyrkhat ka long kaba kongsan bha NAMAR hashwa ban jia eiei ia ka kala ioh noh ia ka jingsumar.
Ha kaba iadei bad ka jingsyier bad ka jingkhuslai ki kmie ki kpa ban phah hi noh ia la ki khun sha skul, ka Agatha kala ong,“Nga ngeit skhem ba ki don ki kor CCTV ha katei ka jaka ba jia kane ka jingjia bad nga ngeit skhem ruh ba kine ki kor kin treikam bad ngi donkam ban pynkhlain shuh shuh ia ki rukom peitngor ha ka jylla baroh kawei”.
Kala ong ba ki pulit kila tohkit halor kane ka jingjia bad ka kyrmen skhem ba kin lah ban poi sha ka thong ban ioh kem ia kine ki briew ba donkti.
 ka Agatha Sangma kala pynrem jur ia ki riewsniew kiba thombor ia kawei ka khynnah skul da kaba dung da u nar injekshon katba ka dang iaid lynti ban leit sha Skul ha ka thain Jaiaw.){kind=link}