Shillong Nohprah 17: Ka Committee on Empowerment of Women, hapoh ka jingialam jongka Chairperson ka Kong Santa Mary Shylla, hynne ka sngi Ba-ar, kala leit jngoh ia ka longkmie kaba la shah thombor ha ka shnong Niriang, Thadlaskein Block, West Jaintia Hills.
Kane ka longkmie kaba don 6 ngut ki khun kynthup ia iwei I khunlung iba dang 1 snem shiteng, kala shah thang da ka ding ha la u kurim.
Ha kane ka jingleit jngoh ia katei ka longkmie kaba lashah thombor, la iadonlang ki dkhot ka Committee kiba kynthup ia u Bah Adelbert Nongrum, Bha Wailadmiki Shylla bad ki heh ophisar jong ka Meghalaya Legislative Assembly Secretariat.
Ka Kong Santa Mary Shylla kala pynpaw ia ka jingkyndit bad jingsngewsih kthang halor katei ka jingjia, kaba la ktah mationg ia ka imlang sahlang baroh kawei”.
“Kane ka jingjia kaba sngew ngiew kala pynkyndit bad pynsngewsih ia ngi baroh” ong ka Kong Shylla.
Kala pynthikna ia ki paidbah, ba ka committee, da ka jingiatreilang bad ki bor pyniaid shnong bad MLA ka thaiñ, kin iatrei shitom ban pynthikna ba ka nongshah thombor kan ioh ia ka jingsumar kaba paka tam bad kala banjur ba ka sorkar ka iengskhem ban ai ia ka jingkyrshan kaba pura.
“Ka jingpang bad jingshitom na ka jingshah pynshitom kan shim por da ki bnai bad ki snem ban ioh ia ka jingkoit jingkhiah, hynrei ngin ieng ryngkat bad ka ha ka lynti iaid haka jingim. Na ka bynta kiwei pat ki dkhot jong ka longiing, phi dei ban tip ba ngi don hangne bad phi man la ka por”.
Ka Chairperson kala kyntu ruh ia ka tnad Pulit ban iaid shakhmat ha ka jingtohkit bniah halor katei ka kam thombor bad ban pynthikna ba ka jingpynshitom bad jingpynsajia kan long kaba heh.
“U Nongleh kam siew ula leh ia ka kam kaba la long shaba palat pud bad kumta ka jingai ia ka jingbishar kaba hok kadei ban long kaba kloi bad kaba eh. Ym dei ban iohlad ban phet na ki bor jong ka aiñ” ka la ong.
Katba u Bah Adelbert Nongrum ula pynthikna ia ki paidbah ba ka Committee ka iengskhem ban buddien halor kane ka kam bad ula pynpaw ia ka jingskhem jingmut ba ka sorkar bad ki bor kiba dei khmih kin trei shitom ban pyndep ia la ka jingkitkhlieh..
“Kito kiba leh ia ki kam runar kin hap ban mad ia ka jingpynshitom halor ka jingle ka jongki hi” ula ong.
“Ha ka imlang sahlang ka jong ngi, ngi don ia ka kamram ban peit iwei na ka bynta iwei pat. Ka jingsngap jar ia kum kane ka jingjia kan long ka bym lah ban pdiang. Ngi dei ban kren ban pynthikna ba kum kine ki jingjia kim dei ban iai jia biang ha kane ka jaka jong ngi” ong u Bah Adelbert.
Katba u Bah Wailadmiki Shylla ula pynshai halor ki katto katne tylli ki scheme jong ka sorkar pdeng bad sorkar jylla kaba kiba mad ia ki apot sepsngi ki lah ban ioh, kaba kynthup ia ka Ayushman Bharat bad ka Victim Compensation Scheme.
Ula ong, “Ka Victim Compensation Scheme ka ai jingkyrshan ia kiba shah thombor kaba nanduh T.3 lak haduh T.7lak. Hashwa ba ngan wan shane, nga lah iasyllok bad ka Legal Service Authority, ha kaba nga la kyrpad ban shimkhia kloi na ka bynta ban ai jingkyrshan mardor”.
